Шумораи кӯдакистонҳо дар Суғд нисбат ба соли гузашта 12 адад зиёд гашт

ДУШАНБЕ, 24.12.2016. /АМИТ «Ховар»/. Дар муассисаҳои томактабии вилояти Суғд 40 ҳазору 777 кӯдак ба таълим фаро гирифта шуд, ки нисбат ба ҳамин давраи соли гузашта 2086 нафар зиёд мебошад.  Дар ин бора аз хадамоти матбуоти вилояти Суғд хабар доданд.

Соли равон шумораи кӯдакистонҳо нисбат ба соли сипаришуда 12 адад зиёд гашта, ба 249 адад расид, ки аз он 196 муассиса тобеи шуъбаи маорифи шаҳру ноҳияҳо, 13 муассиса тобеи ташкилоту корхонаҳо ва 40 муассисаи хусусӣ мебошанд.

Дар таъмини рушди соҳа саҳми бахши хусусӣ сол аз сол афзуда истодааст. Танҳо дар моҳҳои январ-ноябри соли 2016 дар шаҳру ноҳияҳои Хуҷанд 3 адад, Истаравшан 2 адад, Бӯстон 1 адад, Ҷаббор Расулов 1 адад, Бобоҷон Ғафуров 3 адад ва Спитамен 2 адад кӯдакистонҳои хусусӣ ба фаъолият оғоз намуданд.