Иштироки намояндагони Палатаи савдо ва саноати Тоҷикистон дар намоиши «ПРОДЭКСПО-2017» дар Москва

ДУШАНБЕ, 08.02.2017. /АМИТ «Ховар»/. Дар Маркази намоишии «Экспоцентр»-и шаҳри Москваи Федератсияи Россия 24-умин намоишгоҳи байналмилалии маҳсулоти хӯрокӣ, нӯшокӣ ва масолеҳи истеҳсолии «Продэкспо-2017» ифтитоҳ гардид. Тавре аз Палатаи савдо ва саноати Ҷумҳурии Тоҷикистон хабар доданд, дар намоишгоҳи «Продэкспо-2017» (намоишгоҳи маҳсулоти хӯрокворӣ) корхонаҳои узви Палатаи савдо ва саноати Тоҷикистон-ҶММ «Нурфуд», «Оро Исфара», «Зардолу ва К», «Евроазия-2005», «Сахо ва К», «Роҳи Сомон», «Тавҳид ва К» иштирок намуданд. Роҳбарии Намояндагии тиҷоратии Тоҷикистонро директори генералии Палатаи савдо ва саноати Тоҷикистон дар вилояти Суғд Фирдавс Шарифзода ба уҳда дорад.
«Корхонаҳои Тоҷикистон дар намоиш ба таври васеъ меваҳои хушки аз ҷиҳати экологӣ тоза ва табииро пешниҳод карданд. Дар рӯзи аввали намоиш намояндагони кишвари мо бо иштирокчиёни ташкилотҳои истеҳсолкунанда шинос шуданд. Дар раванди намоиш миёни истеҳсолкунандагони тоҷик бо шариконашон гуфтушунид ҷиҳати ба имзо расонидани шартномаҳои ҳамкорӣ дар мавриди таъмин ва расонидани мол баррасӣ мегардад»,- иттилоъ доданд аз Палатаи савдо ва саноати ҷумҳурӣ.