10 нафар Донишкадаи давлатии санъати тасвирӣ ва дизайни Тоҷикистонро бо дипломи аъло хатм намуданд

ДУШАНБЕ, 24.07.2017 /АМИТ «Ховар»/.   Имрӯз дар Донишкадаи давлатии санъати тасвирӣ ва дизайни Тоҷикистон маросими супоридани дипломҳо ва намоиши корҳои дипломии аввалин хатмкунандагони Донишкада баргузор гардид.

Ректори  Донишкадаи давлатии санъати тасвирӣ ва дизайни Тоҷикистон Ҷамшед Ғанизода иброз намуд: «Боиси ифтихор аст, ки аввалин хатмкунандагон имрӯз Донишкадаро бо сари баланд хатм мекунанд. Соли 2013 вақте, ки Донишкада ба фаъолият шурӯъ кард, ба он 100 нафар довталабон қабул шуда буданд. Бинои Донишкада, ки собиқ бинои осорхона буд, маҳз бо ҳамбастагиву кумаки ҳамин хатмкунандагон, ки  он вақт дар курси аввал таҳсили илм мекарданд, ба муассисаи таҳсилоти олӣ табдил дода шуд»,-зикр намуд Ҷамшед Ғанизода.

Сипас, корҳои дипломии хатмкунандагон манзури иштирокдорон гардида, ба онҳо дар вазъияти тантанавӣ диплом супорида шуд.

Бино ба иттилои роҳбарият, имсол  Донишкадаро 106 нафар хатмкунандагон хатм намуданд, ки аз ин шумора 10 нафари онҳо соҳиби дипломи аъло гардиданд.