Пешвои миллат муҳтарам Эмомалӣ Раҳмон забонро воситаи муқтадири сарҷамъии миллат номиданд

ДУШАНБЕ, 5.10.2017 /АМИТ «Ховар»/. Дар Паёми табрикотии худ ба муносибати Рӯзи забони давлатӣ Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон забони давлатиро таҷассумгари таърихи пуршебу фарози миллати бостонии тоҷик номида, зикр кардаанд, ки он бо вуҷуди мушкилоту монеаҳои зиёд ҳамчун риштаи пайванди насл ба насли миллат аз ҳазорсолаҳои дур то давлати соҳибистиқлоли тоҷикон омада расидааст ва решаҳои умри миллатамонро оби ҳаётбахш додааст.

Пешвои миллат арҷгузориро ба забони давлатӣ, ки ҳамчун рукни муҳимтарини ҳастии миллат, пойдевори асосии давлатдорӣ ва фарҳангу маънавиёти халқамон нақши барҷаста дорад, вазифаи инсониву виҷдонии ҳар як фарди бонангу номус шуморидаанд ва изҳор намудаанд, ки «маҳз ба ҳамин хотир, мо забонро мисли истиқлолият, Ватан, Модар ва фарҳанг аз ҷумлаи муқаддасоти миллии худ мешуморем ва онро азизу гиромӣ медорем».

Ба андешаи Сарвари давлат, ҳувияти миллӣ, фарҳанг ва ойину суннатҳои мардуми бостонии мо дар ҳама давру замонҳо тавассути забон ҳифз мегардад ва он воситаи муқтадири сарҷамъии миллат ва ҳамаи онҳоест, ки дар гӯшаҳои гуногуни олам ҳастии ин сарвати бебаҳоро пос медоранд.

Президенти кишвар инчунин бақои забонро бақои миллат ва фанои забонро фанои миллат номида, бори дигар таъкид карданд, ки  дар баробари аз байн рафтани забон миллат низ аз байн меравад.