Маҳмадтоир Зокирзода ба масъулини шаҳри Хоруғ супориш дод, ки нархи гарони меваю сабзавотро паст кунанд

Июль 18, 2019 15:49

ХОРУҒ, 18.07.2019 /АМИТ «Ховар»/.  Муовини Сарвазири Ҷумҳурии Тоҷикистон  Маҳмадтоир Зокирзода  бо соҳибкорони бозори марказии шаҳри Хоруғи Вилояти Мухтори Кӯҳистони Бадахшон суҳбат намуда, бо изҳори нигаронӣ аз нархи гарони меваю сабзавот ба масъулини шаҳр супориш дод, ки арзиши меваю сабзавотро паст кунанд.

Гарчанде  фасли тобистон ба охир мерасаду дар тамоми мамлакат меваю сабзавот фаровон аст, аммо дар бозори шаҳри Хоруғ ҳанӯз ҳам нархҳои ин намуди маҳсулот мисли аввали фасли баҳор гарон ба назар  мерасанд. Яке аз иллатҳои гаронии нарх- ин аз даст ба даст гузаштани маҳсулот мебошад.  Дар натиҷа деҳқоне, ки ду ё се моҳ дар замин, дар гармии тафсон заҳмат мекашад, манфиати камтар мебардорад. Баръакс, аз меҳнати ӯ соҳибкорони беинсоф баҳра бурда, як ё ду маротиба ҳаққи худро ба нархи аслии маҳсулот зам намуда, бо ин рафтори ношоистаи худ кисаи  харидоронро холӣ мекунанд.

Аз ин рӯ муовини Сарвазири ҷумҳурӣ ба мақомоти марбута дастур дод, ки дар зудтарин фурсат дар назди бозори марказӣ ярмарка-фурӯши маҳсулоти кишоварзӣ баргузор кунанд. Ва бояд кӯшиш намоянд, ки ин маҳсулот бе миёнарав ба дасти харидорон расонда шавад, то онҳо барои фасли зимистон ҳам маҳсулоти кофии кишоварзӣ захира карда тавонанд.

Ҳамчунин муовини Сарвазири ҷумҳурӣ зимни боздид аз  ҷараёни корҳои сохтмонӣ дар биноҳои баландошёнаи хонаҳои истиқоматӣ барои кормандони мақомоти ҳифзи ҳуқуқ ва театри вилоятӣ ба бинокорон супориш дод, ки бо истифода аз фасли гарми тобистон суръати корро ҷоннок намоянд. Зеро баъди ҳамагӣ ду моҳ дар ин минтақаи баландкӯҳ мавсими сармо оғоз меёбад ва сардии ҳаво ба сифати сохтмон таъсири манфӣ мерасонад.

-Агар имкон  бошад, корро дар ду баст ташкил карда, ба саҳлангорӣ набояд роҳ дод,- гуфт Маҳмадтоир Зокирзода  ва илова намуд, ки дар доираи амалисозии яке аз ҳадафҳои сиёсати иҷтимоии Ҳукумати мамлакат таъмини ҳаёти шоиста барои ҳар шаҳрванд бо дастгириҳои пайвастаи Ҳукумати ҷумҳурӣ ва шахсан Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам  Эмомалӣ Раҳмон кормандони ниҳодҳои гуногун бо хонаҳои истиқоматӣ таъмин карда мешаванд.  Ҷавобан  ба ин ғамхориҳо  онҳо вазифаи хизматии худро содиқона иҷро мекунанд. Ҳамчунин таваҷҷуҳи асосӣ бояд ба истифодаи самараноки маблағҳои ҷудогардида ва сифати корҳои сохтмонӣ равона гардад.

Маҳмадтоир Зокирзода зимни сафари хеш ҳамчунин аз баъзе муассисаҳои фарҳангию таълимӣ боздид ба амал оварда, дар ҷаласаи ҷамъбасти натиҷаи нимсолаи фаъолияти мақомоти иҷроияи ҳокимияти давлатии Вилояти Мухтори Кӯҳистони Бадахшон  ширкат мекунад.

Июль 18, 2019 15:49

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст