Дар вилояти Суғд Фестивали вилоятии «Ҷилваи рангҳо» доир мегардад

ДУШАНБЕ, 30.08.2019 /АМИТ «Ховар»/.  Бахшида ба Солҳои рушди деҳот, сайёҳӣ ва ҳунарҳои мардумӣ моҳи сентябри соли равон дар вилояти Суғд  Фестивали вилоятии «Ҷилваи рангҳо»   доир карда  мешавад. Дар ин бора ба АМИТ «Ховар» аз хадамоти матбуоти Раиси вилояти Суғд хабар доданд.

Ба иттилои манбаъ, мақсад аз баргузории фестивали мазкур  тарғибу ташвиқи либоси миллӣ, тарбияи зебоипарастӣ, рушди соҳаи саноати сабук, тақвияту густариш бахшидан ба истеҳсолу истифодаи анвои гуногуни либосу матоъҳои миллӣ мебошад.

Фестивали вилоятии «Ҷилваи рангҳо» дар ду давр  доир шуда,  даври аввали он дар сатҳи шаҳру ноҳияҳо ва даври дуюм дар маркази вилоят баргузор мегардад.

Ғолибони даври вилоятӣ  аз рӯи бахшҳои «Беҳтарин либоси қадима ва муосири кӯдакону наврасон», «Беҳтарин либос барои персонажҳои афсонавӣ», «Беҳтарин либосҳои рӯзмарраи духтарон ва занон», «Беҳтарин либос барои ҷавонон, мардон ва мӯйсафедон», «Беҳтарин либоси маросимӣ ва идона», «Беҳтарин либоси расмӣ», «Беҳтарин либоси фароғатӣ» ва «Беҳтарин либос барои хона ва корхона» муайян ва бо мукофотҳои пулӣ сарфароз гардонида мешаванд.

Ғолибони  даври вилоятӣ ба  даври ҷумҳуриявӣ роҳхат пайдо мекунанд.