Китоби «Душанбе-қалби Тоҷикистон» сазовори ҷойи аввал дар Намоишгоҳи байналмилалии «Китоби Душанбе» гардид

Сентябрь 6, 2019 16:20

ДУШАНБЕ, 6.09.2019. /АМИТ «Ховар»/. Имрӯз зимни ҷамъбасти Намоишгоҳи байналмилалии «Китоби Душанбе» китоби «Душанбе-қалби Тоҷикистон»  сазовори ҷойи аввал гардид. Китоби мазкур ба қалами  Мирзоамин Мирсаидзода тааллуқ дошта, дар намоишгоҳ аз рӯи номинатсияи «Асари беҳтарин дар васфи Тоҷикистон» ғолиб дониста шуд. Китоб дастовардҳои шаҳрдории пойтахтро тайи солҳои соҳибистиқлолӣ дарбар мегирад.

Тавре аз Вазорати фарҳанги Ҷумҳурии Тоҷикистон ба АМИТ «Ховар» хабар доданд, дар баробари китоби мазкур як гурӯҳ иштирокчиёни фаъоли намоишгоҳ имрӯз зимни ҷамъбаст аз ҷониби Вазири фарҳанги Ҷумҳурии Тоҷикистон  Шамсиддин Орумбекзода мукофотонида шуданд.

Вазири фарҳанг  Шамсиддин Орумбекзода иброз дошт, ки дар ин намоишгоҳ китобҳое ба маъраз гузошта шудаанд, ки афкори мухталифи ҷомеаро фаро мегиранд. Ба изҳори номбурда, баргузории чунин намоишгоҳҳо барои муаррифии бештари  эҷодиёти пурғановати адибон ва файласуфони тоҷик дар арсаи ҷаҳон  заминаи хуб фароҳам меоварад.

Зикр шуд, ки пешрафту тараққиёти ҳар як кишвар аз насли ҷавону бомаърифати ӯ вобастагӣ дорад.  Аз ин рӯ Ҳукумати мамлакат  ба ин соҳа таваҷҷуҳи махсус равона кардааст.

Дар маросими ҷамъбастии намоишгоҳ инчунин дар номинатсияи «Ношири муваффақ» ҷойи якум ба Нашриёти «Адиб» барои китоби «Куллиёт»- Ҳоҷӣ Муҳаммад Ҳусайни Кангуртӣ, ҷойи дуюм ба ҶММ «Хуросон» барои китоби «Осори Устод Рӯдакӣ», ҷойи сеюм ба нашриёти «Ношир» барои китоби «Гулафшони шеър»-и С.Есенин сазовор дониста шуд.

Дар номинатсияи «Асари беҳтарин дар васфи Тоҷикистон» ҷойи дуюм ба муаллифон Назаршо Назаршоев, Илҳом Бониёзов барои таълифи китоби «Военная история Таджикистана», ҷойи сеюм ба нашриёти «Ношир» барои китоби «Тоҷикистон-Ӯзбекистон: дӯстии безавол» сарфароз дода шуд.

Инчунин аз рӯи номинатсияи «Сермаҳсули сол» ҷойи якум барои силсилаи асарҳо ба муаллифон Мирзо Муллоаҳмад ва Садриддин Ҳасанзод муяссар гардид. Ҷойи дуюм ба Равшан Раҳмонӣ ва ҷойи сеюм ба Латофат Кенҷаева мувофиқ дониста шуд.

Ҳадафи баргузории Намоишгоҳи нуҳуми байналмилалии «Китоби Душанбе» ба намоиш гузоштани комёбиҳо ва дастовардҳои соҳаи табъу нашри миллӣ дар даврони истиқлолияти Ҷумҳурии Тоҷикистон, ҳамчунин тарғибу ташвиқи мероси адабии мардуми тоҷик ва шиносоӣ бо адабиёти ҷаҳон, омӯзиши таҷрибаи ҷаҳонии соҳаи табъу нашри китоб, истифодаи таҷҳизоти муосири полиграфӣ ва дигар маводи чопӣ мебошад.

Ёдовар мешавем, ки Намоишгоҳи мазкур 4 сентябр дар Рӯзи китоб оғоз гардида, дар он қариб 50 корхонаҳои табъу нашр ва ташкилоту муассисаҳои ватаниву хориҷӣ ширкат варзида, зиёда аз сӣ ҳазор китобҳои тозанашр ба маъраз гузошта шуд.

Сентябрь 6, 2019 16:20

Хабарҳои дигари ин бахш

Раиси Ҷумҳурии Бошқирдистони Федератсияи Русия дар Осорхонаи миллӣ бо давраҳои таърихи халқи тоҷик шинос шуд
Дар Русия Конгресси дуюми Ташкилоти умумиҷаҳонии нависандагон баргузор гардид
«Моҳӣ дар шаст» дар Кинофестивали байналмилалии Исфаҳон соҳиби нахустин ҷоизаи байналмилалӣ гардид
Оид ба саҳми таърихии мардумони Тоҷикистону Русия дар Ҷанги дуюми ҷаҳон конфронси байналмилалӣ доир шуд
Ансамбли давлатии «Фалак»-и Тоҷикистон дар ҷашнвораи «Муттаҳидӣ тавассути фарҳанг» дар Сеул иштирок намуд
«ЗАБОНИ МИЛЛАТ — ҲАСТИИ МИЛЛАТ». Дар Душанбе тарҷумаи ҷилди якуми китоби Президенти Тоҷикистон рӯнамоӣ гардид
Ба 7768 хонаводаи ноҳияи Шамсиддини Шоҳин китоби «Шоҳнома» тақдим мегардад
«ФУРӮҒИ СУБҲИ ДОНОӢ КИТОБ АСТ». 434 довталаб ба даври чоруми озмун роҳхат гирифт
Дар ноҳияи Балҷувон тақдими китоби «Шоҳнома» ба 5076 оила идома дорад
Қисми дуюми китоби «Абармарди таърихсоз» аз чоп баромад
ХАЛҚ БАР ХЕШ ПЕШВОРО ДОД. Президенти Тоҷикистон воқеан наҷотофарини миллати мост!
Дар Душанбе Синамоҷашнвораи дуюми байналмилалии «Тоҷи сомон» баргузор мегардад