Ҳайати Парлумони Тоҷикистон ба Ӯзбекистон сафар мекунад

ДУШАНБЕ, 04.10.2019. /АМИТ «Ховар»/. Ҳайати парлумонии Маҷлиси намояндагони Маҷлиси Олии Ҷумҳурии Тоҷикистон таҳти раёсати Раиси Маҷлиси намояндагон Шукурҷон Зуҳуров бо даъвати Раиси Палатаи қонунгузории Олий Маҷлиси Ҷумҳурии Ӯзбекистон Нуридинҷон Исмоилов аз 6 то 9 октябр аз Ҷумҳурии Ӯзбекистон дидан менамояд. Дар ин бора котиби матбуоти Маҷлиси намояндагон Муҳаммадато Султонов ба АМИТ «Ховар» хабар дод.

Дар назар аст, ки Раиси Маҷлиси намояндагон Шукурҷон Зуҳуров ва ҳамроҳони ӯ зимни сафар бо Раиси Сенати Олий Маҷлиси Ҷумҳурии Ӯзбекистон Танзила Нарбаева, Раиси Палатаи қонунгузории Олий Маҷлиси Ҷумҳурии Ӯзбекистон Нуридинҷон Исмоилов ва дигар шахсони расмӣ мулоқот анҷом дода, дар доираи барномаҳои фарҳангӣ аз шаҳри Самарқанд ва дигар ҷойҳои таърихии ин кишвари ба мо дӯсту ҳамсоя боздид намоянд.