Намояндагони корхонаҳои нассоҷиву дӯзандагӣ омоданамоии мутахассисони соҳибкасби маҳаллиро баррасӣ карданд

ДУШАНБЕ, 31.10.2019 /АМИТ «Ховар»/. 30 октябр дар шаҳри Душанбе бо ибтикори Иттифоқи рушди бахши хусусии Тоҷикистон  доир ба масъалаи омодасозии мутахассисони соҳибкасби маҳаллӣ барои соҳаи нассоҷӣ ва дӯзандагии Тоҷикистон суҳбати «мизи мудаввар» доир гардид.  Дар он намояндагони 19 корхонаи нассоҷиву дӯзандагӣ (аъзои ИРБаХТ), нуҳ муассисаи таълимӣ ва созмонҳои байналмилалӣ ҷамъ омада,  перомуни масъалаи мазкур сухан карданд.

Раиси Шӯрои Иттифоқи рушди бахши хусусии Тоҷикистон Файзалӣ Раҷабов зикр намуд, ки  «дониш барои тиҷорат калиди муваффақият буда, имрӯз дарёфти мутахассисон дар самтҳои асосӣ барои рақобатпазирии саноати мо монеаҳои ҷиддӣ эҷод мекунад. Зеро шумораи мутахассисоне, ки ба талаботи имрӯзаи соҳа ва бозори меҳнат ҷавобгӯянд, кам мебошад».

Мақсад аз баргузор намудани ҳамоиши мазкур- ин боло бурдани сатҳи рақобатпазирии соҳаи нассоҷиву дӯзандагии Тоҷикистон ва рушд додани корхонаҳои хурду миёна дар Тоҷикистон мебошад.

Ёдовар мешавем, ки ҳамоиши мазкур бо ибтикори Иттифоқи рушди бахши хусусии Тоҷикистон дар чаҳорчӯбаи Барномаи ҷаҳонии нассоҷӣ ва дӯзандагӣ дар Тоҷикистон, ки аз ҷониби Ҳукумати Швейтсария маблағгузорӣ мешавад, роҳандозӣ гардид.