«Фотеҳи қуллаи ормонҳои миллат», — таҳти ин унвон дар Донишкадаи давлатии забонҳои Тоҷикистон конференсия баргузор гардид

Ноябрь 30, 2019 13:03

ДУШАНБЕ, 30.11.2019 /АМИТ «Ховар»/. Имрӯз  дар Донишкадаи давлатии забонҳои Тоҷикистон ба номи Сотим Улуғзода конференсияи ҷумҳуриявӣ таҳти унвони «Фотеҳи қуллаи ормонҳои миллат»  баргузор гардид. Конференсияи мазкур  дар доираи  нақшаи  чорабиниҳои донишкада бахшида ба таҷлили сазовори ҷашни 30-солагии Истиқлолияти давлатии Ҷумҳурии Тоҷикистон баргузор гардида, дар он  роҳбарият, устодону донишҷӯёни донишгоҳ, инчунин олимон, коршиносон, кормандони  муассисаҳои илмӣ-тадқиқотӣ ва таълимии мамлакат иштирок намуданд.

Тавре мухбири АМИТ «Ховар» иттилоъ медиҳад, конференсияро ректори донишкада, профессор  Маҳмадулло Раҷабзода ифтитоҳ намуда,  аз ҷумла зикр кард, ки  дар тӯли таърих тоҷикон ба марҳилаи ҳассосу тақдирсози зиёд рӯ ба рӯ гардидаанд. «Хушбатона, ин миллати  соҳибфарҳангу соҳибтамаддун дар ҳама давру замон, ҳатто дар мудҳиштарин давру замон бо шарофати зуҳури шахсиятҳои фарзона дар арсаи сиёсат ва илму фарҳанг аз вартаи нобудӣ наҷот ёфта, ба сӯи ваҳдату ҳамбастагӣ ва саодату пирӯзӣ раҳсипор гардидааст. Мо, давомдиҳандагони ин  миллати тамаддунофар бояд, ин анъанаи неки  ниёгонро идома дода, бо созандагию ободкорӣ Тоҷикистони шукуфоро  ба ояндагон  мерос  гузорем. Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз зумраи чунин фарзандони  фарзонаи миллати мост, ки дар замони басо ҳассосу душвори таърихи миллат зимоми давлатдориро ба даст гирифта,  ҷомеаи моро  ба сӯи  созандагию ободӣ ва ояндаи дурахшон раҳнамоӣ мекунанд».

 Устоди ҳамин  донишгоҳ Ҳабибулло Нарзуллоев  иброз дошт, ки «Президенти мамлакат  муҳтарам Эмомалӣ Раҳмон   маорифро омили муҳими таҳкими давлат ва наҷоти миллат номидаанд ва дар сиёсати хеш онро  дар ҷои аввал мегузоранд. Пешвои миллат зарурати таълиму тарбияи мутахассисони забондон ва дар бозори меҳнат рақобатпазирро пайваста ба сифати яке аз вазифаҳои муҳими давлатӣ таъкид менамояд».

«Ин дастуру ҳидоятҳои  Эмомалӣ Раҳмон ҳар яки моро водор месозад, ки бо дарки масъулияти баланд ва худшиносӣ дар татбиқи  онҳо   тамоми имкониятҳоро истифода барем. Рисолати мо ин аст, ки  мутахассисони баландихтисос, забондону хештаншинос, бонангу номусро ба воя расонем, то ин ки онҳо  ворисони арзандаи Пешвои хеш, фотеҳи қуллаи ормонҳои миллат  бошанд»-афзуд  номбурда.

Дар конференсия  таъкид гардид, ки имрӯз ташаббусҳои Пешвои миллати тоҷикон дар арсаи байналмилалӣ бо камоли эҳтиром  қабулу ҷонибдорӣ  мегарданд, ки онҳо обрӯи Тоҷикистонро дар  сатҳи ҷаҳон боло бурдаанд.

Ҳамчунин гуфта шуд, ки   29 ноябри соли равон дар шаҳри Тошканди Ҷумҳурии Ӯзбекистон вохӯрии дуюми машваратии сарони давлатҳои Осиёи Марказӣ сурат гирифт. Бо қарори Хазинаи Байналмилалии наҷоти Арал, ба таври гузариш, ба муҳлати се сол, шурӯъ аз соли 2020 раисӣ  дар ин Хазинаи Байналмилалӣ  ба Тоҷикистон вогузор шуд ва  Президенти Ҷумҳурии Тоҷикистон муҳтарам Эмомалӣ Раҳмон  Раиси Хазинаи Байналмилалии наҷоти Арал интихоб гардид, ки бори дигар аз нуфузи мамлакати мо дар арсаи ҷаҳонӣ дарак медиҳад.

Ноябрь 30, 2019 13:03

Хабарҳои дигари ин бахш

НИШАСТИ МАТБУОТӢ. Дар шашмоҳаи якуми соли 2025 беш аз 58 ҳазор шаҳрвандон ба нафақа баромадаанд
Вазири адлияи Тоҷикистон: «Бекоршавии ақди никоҳ тамоюли камшавӣ дорад»
НИШАСТИ МАТБУОТӢ. Дар шашмоҳаи якуми соли 2025 шумораи парвандаҳои судӣ коҳиш ёфтааст
НИШАСТИ МАТБУОТӢ. Ба 5803 нафар шаҳрванд машварати ҳуқуқӣ расонида шуд
Дар ноҳияи Файзобод иншооти соҳаи тандурустӣ бунёду навсозӣ карда мешаванд
Дар ноҳияи Шаҳристон доир ба Ваҳдати миллӣ чун рукни асосии ташаккули ҷомеа ва давлат вохӯрӣ баргузор шуд
Маҷлиси Кумитаи иҷроияи Ҳизби Халқии Демократии Тоҷикистон дар шаҳри Душанбе баргузор гардид
НИШАСТИ МАТБУОТӢ. Маркази тадқиқоти стратегӣ бо 26 маркази тадқиқотии хориҷӣ созишномаҳо ба имзо расонид
НИШАСТИ МАТБУОТӢ. Зиёда аз 57 миллион сомонӣ маблағ ба манфиати модару кӯдак ситонида шудааст
Дар Тоҷикистон содиршавии ҷиноят нисбат ба кӯдакон 30 фоиз зиёд шудааст
НИШАСТИ МАТБУОТӢ. Ваколатдор оид ба ҳуқуқи инсон дар Тоҷикистон бо мақомоти ваколатдори Қатар ва Булғористон Ёддошти тафоҳум ба имзо мерасонад
Дар истироҳатгоҳи «Ширкент» 1783 нафар кӯдакону наврасон ба истироҳати бофароғат фаро гирифта шуданд