«Пайғоми эҳё ба насли фардо — Ман ба шумо сулҳ меорам»-ҳамоиши илмӣ-оммавӣ дар Китобхонаи миллӣ

ДУШАНБЕ, 14.11.2019./АМИТ «Ховар»/. Имрӯз бо ташаббуси   Медиатекаи Президенти Ҷумҳурии Тоҷикистон ва шуъбаи тарғиб ва баргузории барномаҳои фарҳангии Муассисаи давлатии «Китобхонаи миллии Тоҷикистон» бахшида ба Рӯзи Президенти Ҷумҳурии Тоҷикистон таҳти унвони «Пайғоми эҳё ба насли фардо — Ман ба шумо сулҳ меорам» ҳамоиши илмӣ-оммавӣ доир гардид.

Дар он директори Муассисаи давлатии «Китобхонаи миллии Тоҷикистон», доктори илми педагогӣ, профессор Абдусалом Мирализода, раиси Кумитаи иҷроияи Ҳаракати ваҳдати миллӣ ва эҳёи Тоҷикистон Мирзошоҳрух Асрорӣ, намояндаи Маркази тадқиқоти стратегии назди Президенти Ҷумҳурии Тоҷикистон Абдулло Раҳнамо ва кормандони китобхонаи мазкур иштирок намуданд.

Абдусалом Мирализода бо сухани ифтитоҳӣ ҳамоишро оғоз намуд.

Сипас, Мирзошоҳрух Асрорӣ ва намояндаи Маркази тадқиқоти стратегии назди Президенти Ҷумҳурии Тоҷикистон Абдулло Раҳнамо роҷеъ ба корномаи содиқонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, чаҳор ҳадафи стратегии Ҳукумати мамлакат, ки бо ташаббуси бевоситаи Сарвари давлат роҳандозӣ шудаанд, маърӯза карданд.

Зикр шуд, ки тибқи назари коршиносону сиёсатшиносон, бузургдошти Рӯзи Президенти Ҷумҳурии Тоҷикистон ба маънои дарки аҳамияти калидии ин ниҳоди давлатӣ дар ҳифзу тараққии давлатдории миллии мо ва ҳамчунин ҷашни қадрдонию сипос ба тамоми он арзишҳои баланди давлати миллӣ ва шаҳрвандие мебошад, ки Президенти Ҷумҳурии Тоҷикистон ҳамчун кафили конститутсионии онҳо фаъолият мекунад. Ин аст, ки Рӯзи Президенти Ҷумҳурии Тоҷикистон ҷашни ҳар як шаҳрванди худшиносу ватандӯст ва санаи ифтихорӣ барои ҳар сокини озоду осудаи Тоҷикистони навин аст.

Ҳарчанд дар мамлакат ҷашнҳои гуногуни миллию давлатӣ бо рамзу намод, анъана ва суннатҳои миллӣ хеле зиёданд ва сокинони мамлакат онҳоро ба тарзи гуногун истиқбол мегиранд, аммо дар байни ин ҳама ҷашнҳо Рӯзи Президенти Ҷумҳурии Тоҷикистон миёни мардуми шарифи мамлакати офтобиву шукуфоямон нақш ва мақоми хосса дорад. Зеро таҷлили шукӯҳманди ин санаи арзишманд моро водор ба он месозад, ки самимияту эҳтироми хосса ва арҷгузориҳои худро дар Рӯзи Президент ба Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иброз намоем.

Дар охири ҳамоиш байни маърӯзачиён ва иштирокдорон  суолу ҷавоб сурат гирифт.