Азизулло Исматзода: «Агентии хоҷагии ҷангал ба парвариши намудҳои гуногуни дарахту буттаҳои маҳаллӣ диққати ҷиддӣ медиҳад»

ДУШАНБЕ, 04.02.2020 /АМИТ «Ховар»/.  Агентии хоҷагии ҷангали назди Ҳукумати Ҷумҳурии Тоҷикистон ба парвариши намудҳои гуногуни дарахту буттаҳои  маҳаллӣ, ки ба шароити ҷумҳурӣ хос буда, дар раванди тағйирёбии иқлим  хеле муҳим мебошанд, диққати ҷиддӣ медиҳад. Бо ин мақсад имрӯз дар 5 Корхонаи воҳиди давлатии хоҷагиҳои ниҳолпарварӣ ва ниҳолхонаҳои хурди назди хоҷагиҳои ҷангали низоми Агентӣ кӯчату ниҳолҳои дарахтони сояафкан, ороишӣ, ҳамешасабз ва мевадиҳанда парвариш мешаванд. Ин матлабро имрӯз зимни нишасти хабарӣ директори  Агентии хоҷагии ҷангали назди Ҳукумати Ҷумҳурии Тоҷикистон Азизулло Исматзода баён дошт.

Ба иттилои Азизулло Исматзода, то имрӯз ба миқдори беш аз 1 ҳазору 745 бех ниҳоли қарағоч, писта, чормағз, хуч, санҷит, ангат, зелол, шулаш, акатсия, булут, каштан, айлант, шумтол, сафедор, дроки испанӣ ва мевадиҳанда, аз қабили себ, нок, зардолу, олу, хурмо, шафтолу, ангур, анор ва ғайра барои шинонидан ва фурӯш тайёр мебошанд.

«Аз миқдори умумии кӯчату ниҳолҳои парваришгардида бештарашро дарахту буттаҳои ҳамешасабз ташкил медиҳанд.  Асосан дарахтони  сӯзанбарг зиёда аз 517 ҳазор бехро ташкил намуда, имрӯз барои шинонидан ва фурӯш омода мебошанд»,- иброз дошт директори  Агентии хоҷагии ҷангали назди Ҳукумати Ҷумҳурии Тоҷикистон.