Ёддоштҳои табодулӣ миёни ҳукуматҳои Тоҷикистон ва Япония барои мубориза бо СOVID-19 ба имзо расиданд

Июнь 19, 2020 15:24

ДУШАНБЕ, 19.06.2020 /АМИТ «Ховар»/.  Имрӯз зимни мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо  Сафири Фавқулода ва Мухтори Япония дар Ҷумҳурии Тоҷикистон Такаюки Мияшита масъалаҳои муносибатҳои дуҷонибаи Тоҷикистон ва Япония баррасӣ шуданд. Инчунин ҷонибҳо ҳамкории ду кишварро дар самти мубориза бо бемории ҳамагири СOVID-19 мавриди баррасӣ қарор дода, Ёддоштҳои табодулӣ байни Ҳукумати Ҷумҳурии Тоҷикистон ва Ҳукумати Япония роҷеъ ба расонидани кумаки башардӯстонаи Ҳукумати Япония ба Тоҷикистон барои мубориза бо СOVID-19 дар чаҳорчӯби «Барномаи рушди иқтисодӣ ва иҷтимоӣ» ба имзо расиданд.

Дар маросими имзои ёддоштҳои табодулӣ Вазири корҳои хориҷӣ Сироҷиддин Муҳриддин қайд кард, ки боиси  хушнудии ҷониби Тоҷикистон аст, ки дар тӯли 28 соли муносибатҳои дипломатӣ ду кишвар ҳамкориҳои наздик ва дӯстонаро, ки доираи васеи соҳаҳои мухталифро дарбар мегиранд, густариш доданд. Дар ин раванд мо шоҳиди рӯйдодҳои муҳим, аз ҷумла мубодилаи сафарҳо дар сатҳи олӣ, дар равобити дуҷонибаи Тоҷикистону Япония гаштаем.

«Япония яке аз муҳимтарин шарикони рушди Тоҷикистон аст. Ҳамкориҳои гуногунҷанба дар соҳаҳои мухталиф, ки барои кишвари мо аҳамияти ҳаётӣ доранд, ба роҳ монда шудаанд. Мо аз кумакҳои Япония дар соҳаҳои зерсохторӣ, тандурустӣ, беҳдошт, некӯаҳволии ҷомеа, омӯзиш ва рушди малакаҳо дар доираи Кумаки расмии рушд (ODA) миннатдорем. Бояд қайд кард, ки таълим ва рушди захираҳои инсонӣ яке аз самтҳои авлавиятноки стратегӣ дар Тоҷикистон мебошанд. То кунун беш аз 2250  мутахассис аз Тоҷикистон дар давраҳои гуногуни бозомӯзӣ дар Япония таҳсил карданд. Аз соли 2009 ин ҷониб лоиҳаи Стипендияи рушди захираҳои инсонӣ аз ҷониби Барномаи кумаки Япония (JDS) тавассути рушди нерӯи мутахассисони ҷавон дар бахшҳои муносибатҳои байналмилалӣ, ҳуқуқ, иқтисодиёт ва менеҷмент саҳми арзанда гузошта истодааст», — гуфт Сироҷиддин Муҳриддин.

Ҳамчунин зикр шуд, ки  бемории COVID-19 мушкили тамоми ҷомеаи ҷаҳонӣ буда, пирӯзӣ бар он саъю кӯшиши дастаҷамъонаи ҳамаи кишварҳои ҷаҳонро талаб мекунад. Зеро бар асари ин бемории ҳамагир ҳазорон нафар дар саросари дунё ҷони худро аз даст доданд.

Имрӯз коронавируси нав барои тамоми кишварҳо мояи нигаронӣ аст. Тавре маълум аст, бо вуҷуди андешидани тадбирҳои зиддиэпидемиологӣ бобати пешгирии паҳншавии коронавирус дар
Тоҷикистон, охири апрели соли равон нахустин ҳолатҳои гирифторӣ ба ин беморӣ тасдиқ шуд. Вале, хушбахтона имрӯз шумораи шахсони сироятёфта ба коронавирус дар мамлакат рӯз аз рӯз коҳиш ёфта, 71.2 фоизи беморон шифо ёфтанд.

Сафири Фавқулода ва Мухтори Япония дар Ҷумҳурии Тоҷикистон Такаюки Мияшита иброз дошт, ки дар Тоҷикистон бинобар андешидани чораҳои  зарурии Ҳукумати мамлакат ва мусоидати аҳолӣ  шумораи гирифторони  COVID-19 кам шуд. Мутаасифона COVID-19 дар тамоми ҷаҳон паҳн шуда, таъсири худро расонид. Бинобар ин, барои аз байн бурдани ин вирус бояд тамоми кишварҳо якҷо кор кунанд, зеро танҳо дар ин ҳолат мо метавонем бар он ғолиб шавем.

Дар анҷом Вазири корҳои хориҷии Ҷумҳурии Тоҷикистон Сироҷиддин Муҳриддин аз номи Ҳукумати Тоҷикистон барои баррасии фаврии расонидани ёрии башардӯстона ба Ҳукумати Япония изҳори миннатдорӣ намуд.

Июнь 19, 2020 15:24

Хабарҳои дигари ин бахш

Дар шаҳри Ал-Кувайт ангурҳои сернавъ ва хуштаъми тоҷикӣ муаррифӣ гардид
Тоҷикистон ба мардуми Афғонистон изҳори тасаллӣ намуд
Парлумонҳои Тоҷикистон ва Эрон дар рушди ҳамкории дуҷониба нақши муассир доранд
Имконоти сайёҳии Тоҷикистон дар Москва муаррифӣ гардид
Дар Душанбе дурнамои ҳамкории Тоҷикистон ва Қазоқистон баррасӣ карда шуд
Санадҳои ниҳоии Конфронси байналмилалии сатҳи баланд оид ба ҳифзи пиряхҳо интишор гардиданд
Дар Москва Парчами давлатии Тоҷикистон ба ифтихори 34-солагии Истиқлолият намоиш дода мешавад
Бо ташаббуси Тоҷикистон Қатъномаи нави СММ оид ба ҳамкорӣ бо ИДМ қабул гардид
Тоҷикистон ва Эрон ҳамкориро дар соҳаи китобдорӣ ва фарҳанг густариш медиҳанд
Тоҷикистон ва Ҷопон масъалаҳои муҳими ҳамкориро баррасӣ намуданд
Дар Душанбе дурнамои равобити Тоҷикистон ва Иттиҳоди Аврупо баррасӣ гардид
9 сентябр шаршараи Ниагара бо рангҳои Парчами давлатии Ҷумҳурии Тоҷикистон фурӯзон хоҳад шуд