Дар Хоруғ аксияи «Беҳдошти саломатӣ барои шаҳрвандон» гузаронида шуд

ДУШАНБЕ, 10.12.2020 /АМИТ «Ховар»/. Бо мақсади пешгирӣ аз паҳншавии бемории сироятии Ковид-19 ва хуруҷи дигар бемориҳои сироятӣ аз ҷониби кормандони Раёсати Вазорати корҳои дохилии ҷумҳурӣ дар Вилояти Мухтори Кӯҳистони Бадахшон дар ҳамкорӣ бо Раёсати Хадамоти назорати давлатии тандурустӣ ва ҳифзи иҷтимоии аҳолӣ дар ВМКБ дар маркази шаҳри Хоруғ аксияи «Беҳдошти саломатӣ барои шаҳрвандон» гузаронида шуд. Дар ин бора аз Вазорати корҳои дохилии Ҷумҳурии Тоҷикистон ба АМИТ «Ховар» хабар доданд.

Ба сокинон ва меҳмонон дар маркази шаҳри Хоруғ барои беҳдошти саломатӣ ва пешгирии бемории сироятии Ковид -19, ки имрӯзҳо авҷи дуюми он дар тамоми дунё ба мушоҳида мерасад, зиёда аз ҳазор адад ниқобҳо ройгон тақсим карда шуданд.

Мушоҳидаҳо нишон медиҳанд, ки шаҳрвандони мамлакат аз таҷрибаи дигар кишварҳо ва тадбирандешиҳои давлат хатари бемориҳои сироятиро хуб дарк карда, тибқи тавсияи табибон амал намуда, худ ва наздиконашонро аз гирифторӣ ба бемориҳои сироятӣ ҳифз менамоянд. Кӯшишу заҳматҳои роҳбарони давлат ва Ҳукумати Ҷумҳурии Тоҷикистон ба он равона гардидааст, ки шаҳрвандон аз ҳама гуна бемориҳо муҳофизат карда шаванд, зеро саломатии миллат боигарии давлат мебошад.

Чунин тадбирҳои пешгирикунанда дар дигар шаҳру ноҳияҳои ВМКБ низ роҳандозӣ шуда истодаанд.