Дар Тоҷикистон қоидаҳои имло тағйир меёбанд

ДУШАНБЕ, 18.02.2021 /АМИТ «Ховар»/. Дар Тоҷикистон қоидаҳои имло тағйир меёбанд. Лоиҳаи санади дахлдор ба баррасии Ҳукумати Ҷумҳурии Тоҷикистон пешниҳод шудааст. Дар ин бора дирӯз зимни нишасти матбуотӣ дар Душанбе раиси Кумитаи забон ва истилоҳоти назди Ҳукумати Тоҷикистон Олимҷон Муҳаммадҷонзода хабар дод.

Ба гуфтаи роҳбари Кумита, мутахассисони идора қоидаҳои нави имлои забони тоҷикиро таҳия кардаанд, ки 108 тағйироти хурду бузургро дар бар мегиранд.

“Мо ба решаҳои тоҷикии худ баргаштем. Хусусиятҳои фонетикии садонокҳо ва ҳамсадоҳо ба оҳанги аслии худ баргаштанд ”, — шарҳ дод раиси кумита.

Муҳаммадҷонзода иброз кард, ки то имрӯз як мушкил ҳалношуда боқӣ мондааст — ин имлои якчанд калимаҳо ва ҳарфҳо, аз ҷумла калимаҳои дорои «ы», «ц», «ь», «щ» мебошад. Қаблан ин ҳарфҳо дар алифбои тоҷикӣ ҳузур доштанд, аммо соли 1998 бардошта шуданд.

Раиси Кумитаи забон ва истилоҳот шарҳ дод, ки ислоҳот имлои нави ин ҳарфҳоро сабт хоҳанд кард, аммо зикр кард, ки худи ин ҳарфҳо ба забон барнамегарданд. «Ҳама ҷузъиёти имлои нав пас аз тасвиб шудан ба мутахассисон ва аҳолӣ пурра шарҳ дода мешаванд», — зикр намуд ӯ.

АКСИ: АМИТ «Ховар»