Дар Тоҷикистон шумораи ҳайвоноти нодир афзоиш меёбад

ДУШАНБЕ, 04.02.2021 /АМИТ «Ховар»/. Дар Тоҷикистон шумораи гӯсфандони кӯҳӣ (архар ё «Марко Поло») ба беш аз 26 ҳазору 480 сар расидааст. Тавре хабаргузории «Авесто» иттилоъ медиҳад, дар ин бора Кумитаи ҳифзи муҳити зисти назди Ҳукумати ҶТ изҳор доштааст.

Тибқи маълумоти Кумитаи ҳифзи муҳити зист, саршумораи бузҳои пармашох  беш аз 2,7 ҳазор сар, гавазни бухороӣ — аз 500 то 520 сар, бабрҳои барфӣ то 300-350 сар ва хирсҳои бӯр — то 800 сар зиёд шудааст.

Мисли солҳои қаблӣ имсол низ барои шикори ҳайвоноти ваҳшӣ, аз ҷумла барои бузи пармашох — 13 квота, гӯсфанди бухороӣ — 12 -то, гӯсфанди “Марко Поло” — 105 -то ва хирси бӯр — 10 -то ҷудо шудаанд.

Арзиши шикори ҳайвоноти нодир ба намудҳои он вобаста аст. Аз ҷумла, шикори як гӯсфанди наринаи “Марко Поло” 55 ҳазор сомонӣ, бузи пармашох — 337,8 ҳазор сомонӣ, гӯсфанди кӯҳии бухороӣ — 28,1 ҳазор сомонӣ, хирси бӯр — 10,8 ҳазор сомонӣ мебошад.

Дар айни ҳол зикр карда шуд, ки корҳои биотехникӣ барои аз сардиҳои зимистон беталаф баровардани ҳайвоноти ваҳшӣ идома доранд. Бо ин мақсад барои ҳайвоноти ваҳшӣ дар ҷойҳои дахлдор хӯрок гузошта мешавад.

Аз ҷумла, 8030 кг гандум, 1459 кг ҷав, 11350 кг хасбеда, 1615 кг кунҷора ва сабӯс, 1520 кг намак ва 470 кг ҷуворимакка сарф шудааст.

АКС аз бойгонӣ