ЯК РӮЗ ДАР ТАЪРИХ. Расо 20 сол қабл дар ҳамин рӯз Созмони ҳамкории Шанхай таъсис дода шуд

ДУШАНБЕ, 15.06.2021 /АМИТ «Ховар»/. 15 июни соли 2021 ба таъсиси Созмони ҳамкории Шанхай расо 20 сол пур шуд. Маҳз дар ҳамин рӯз, 15 июни соли 2001 дар мулоқоти сарони давлатҳои Чин, Қазоқистон, Қирғизистон, Россия, Тоҷикистон ва Ӯзбекистон баёния дар бораи таъсиси СҲШ имзо карда шуд. Соли 2017 Ҳиндустон ва Покистон ба узвияти СҲШ пазируфта шуданд.

Дар тӯли 20 сол СҲШ дар сиёсати дохилӣ «рӯҳияи Шанхай»-ро пайгирӣ карда, дар корҳои хориҷӣ принсипҳои напайвастан, хусусияти зидди кишварҳои сеюм надоштан ва ошкоро буданро риоя кардааст.

Имрӯз СҲШ ҳамчун як созмони байниҳукуматии сатҳи ҷаҳонӣ, ки дорои 8 кишвари узв, 4 давлати нозир ва 6 давлати шарики муколама аст, фаъолият дошта, дар ҳалли масъалаҳои АвруОсиё ва байналмилалӣ як нерӯи муҳими созанда мебошад.

Ёдовар мешавем, ки соли 2021 СҲШ-ро Ҷумҳурии Тоҷикистон раисӣ мекунад. Саммити ҷашнии СҲШ рӯзҳои 16-17 сентябри соли 2021 дар шаҳри Душанбе баргузор мешавад.