Авзои сиёсию амниятии Афғонистон ба ҳамлу нақли байналмилалӣ миёни Тоҷикистон ва Афғонистон халал эҷод накардааст

ДУШАНБЕ, 14.07.2021 /АМИТ «Ховар»/. Дар иртибот ба авзои сиёсию амниятии Афғонистон ҳамлу нақли байналмилалии бору мол тавассути марзи Тоҷикистон ва Афғонистон халалдор нагардидааст. Тавре имрӯз Вазири нақлиёти Ҷумҳурии Тоҷикистон Азим Иброҳим зимни нишасти матбуотӣ ба намояндагони расонаҳои хабарӣ гуфт, танҳо 13 июл тавассути гузаргоҳи сарҳадии Панҷи Поён-Шерхонбандар 51 мошини ҳомили бор аз Тоҷикистон ба Афғонистон ва 71 мошин бор аз Афғонистон ба Тоҷикистон интиқол дода шудаанд.

Вазири нақлиёт афзуд, ки интиқоли бору мусофирон дар самти байналмилалӣ тариқи 18 гузаргоҳи сарҳади давлатӣ пешбинӣ шуда, бо сабабҳои пешгирии бемории сироятии СOVID-19 тариқи 9 гузаргоҳ ҳамлу нақл ба роҳ монда шуд. Дар ин давра 965,3 ҳазор тонна бор бо гардиши 1513,7 миллион тонна/км ва 0,7 ҳазор мусофир бо гардиши 0,5 миллион мусофир/км интиқол дода шудаанд, ки нисбат ба шашмоҳаи якуми соли 2020 боркашонӣ 124,6 фоиз, гардиши бор 115,1 фоиз, мусофирбарӣ ва гардиши мусофирон 1 фоизро ташкил дод.

Дар нишаст гуфта шуд, ки ба ҳолати якуми июли соли равон дар бозори хизматрасониҳои нақлиёти автомобилии кишвар 1746 субъекти хоҷагидор, аз ҷумла 210 корхонаҳои нақлиёти автомобилӣ (84 адад мусофирбар, 93 адад боркаш ва 33 адад омехта боркашу мусофирбар), 51 терминали мусофирбарӣ, 11 терминали боркашонӣ, 1397 нуқтаи таъмир ва хизматрасонии техникии таъмири нақлиёт ва 77 қароргоҳи нақлиёти автомобилӣ, инчунин 897 хатсайри мусофирбарӣ (179 шаҳрӣ, 582 наздишаҳрӣ, 119 байнишаҳрӣ ва 17 байналмилалӣ (муваққатан бо сабаби паҳншавии бемории сироятии СOVID-19 фаъолият намекунанд) ба қайд гирифта шудаанд.