Дар минтақаи Кӯлоб 59 954 га замин обёрӣ карда шуд

КӮЛОБ, 18.07.2021. /АМИТ «Ховар»/. Аз ҷониби Идораи давлатии беҳдошти замин ва обёрии шаҳру ноҳияҳои минтақаи Кӯлоб дар шашмоҳаи якуми соли 2021 ба истифодабарандагони оби полезӣ дар майдони 59954 га замин тибқи шартномаи тарафайн об дастрас гардид, ки 100%-и нақшаро дар бар мегирад. Дар ин бора зимни нишасти матбуотӣ сардори Идораи беҳдошти замин ва обёрии минтақаи Кӯлоб Амирхон Маҳсиддинов хабар дод.

Зикр шуд, ки сол аз сол шартномаи хоҷагиҳои деҳқонӣ бо Идораи беҳдошти замин ва обёрӣ бештар мегардад. Дар натиҷаи таъмини оби полезӣ ба хоҷагиҳои деҳқонӣ ҳамасола ҳосили фаровон ба даст оварда шуда, нархи маҳсулот дар бозори марказӣ коҳиш меёбад.

Дар минтақаи Кӯлоб 15 адад пойгоҳи обкашии дохилихоҷагӣ бо шумораи 30 адад агрегат фаъолият дошта, ба кишоварзон ба миқдори 174 ҳазору 495 куб оби полезӣ таъмин карда шудааст. Дар ин давра 1689,61 км заҳбуру заҳкашҳо тоза карда шуданд, ки аз ин шумора 402,14 км заҳбуру заҳкашҳои байни хоҷагӣ ва 1287,47 км заҳбуру заҳкашҳои дохили хоҷагӣ мебошанд.

Баҳри тоза кардани заҳбуру заҳкашҳо 69 адад техникаҳои ёрирасон сафарбар карда шуда, дар мавзеъҳои хавфнок низ корҳои барқарорсозиро идома медиҳанд.