Дар судҳои иқтисодии Тоҷикистон беш аз 2 ҳазор адад парванда баррасӣ шуд

ДУШАНБЕ, 22.07.2021. /АМИТ «Ховар»/. Натиҷаи омўзиш ва таҳлили омори фаъолияти судӣ дар самти баамалбарории адолати судӣ собит месозад, ки шашмоҳаи аввали соли равон дар судҳои иқтисодии ҷумҳурӣ  2081 адад парвандаҳои иқтисодӣ баррасӣ гардидаанд. Аз ҷумла, бо баровардани ҳалномаи 925 парванда истеҳсолот доир ба 70 парванда қатъ шуда, 110 ариза бебаррасӣ мононда шуд. Имрӯз зимни нишасти матбуотӣ муовини раиси Суди Олии иқтисодии Ҷумҳурии Тоҷикистон Файзалӣ Комилӣ иттилоъ дод.

Ба зикри мавсуф, дар ин давра  қабули 5 ариза рад ва 341 арзу дархостҳо бинобар ба талаботи қонунгузории мурофиавӣ мутобиқ набуданашон баргардонида шуданд. Дар суди марҳилаи кассатсионӣ 163 ва дар суди марҳилаи назоратӣ 151 парванда баррасӣ карда шуданд.

“Судҳои иқтисодӣ 151 (122) парвандаро дар мурофиаҳои сайёри судӣ баррасӣ намуда, доир ба парвандаҳои баррасигардида 172 таъйиноти хусусӣ бароварда, барои чораҷӯӣ ирсол карданд”,- гуфт муовини раиси Суди Олии иқтисодӣ.