Дар Тошканд мулоқоти вазирони корҳои хориҷии давлатҳои Осиёи Марказӣ баргузор гардид

ДУШАНБЕ, 15.07.2021 /АМИТ «Ховар»/. 14 июл дар шаҳри Тошканд дар ҳошияи Конфронси байналмилалии «Осиёи Марказӣ ва Ҷанубӣ: иртиботи мутақобилаи минтақавӣ. Чолишҳо ва имкониятҳо» Вазири корҳои хориҷии Тоҷикистон Сироҷиддин Муҳриддин дар ҷаласаи вазирони корҳои хориҷии давлатҳои Осиёи Марказӣ ширкат варзид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Роҳбарони мақомоти корҳои хориҷӣ масъалаҳои омодагиро ба ҷаласаи навбатии Вохӯрии машваратии сарони давлатҳои Осиёи Марказӣ, ки 6 августи 2021 дар шаҳри Туркманбошӣ баргузор мегардад, муҳокима карданд.

Зимни ҷаласа омодагӣ ҷиҳати роҳандозии ҳамкории зич дар самти васеъ кардани муҳтавои Вохӯрии машваратии дарпешистодаи сарони давлатҳо ва дар чаҳорчӯби он доир намудани Форуми иқтисодии Осиёи Марказӣ, намоишгоҳи истеҳсолкунандагони миллии кишварҳои минтақа, Муколамаи занон-пешвоёни Осиёи Марказӣ ва дигар чорабиниҳо изҳор гардид.

АКС аз ВКХ ҶТ