Донишгоҳи давлатии тиҷорати Тоҷикистон ба даҳгонаи мактабҳои олии беҳтарини ҷумҳурӣ шомил гардид,-бардошт аз нишасти матбуотӣ

ДУШАНБЕ, 14.07 2021 /АМИТ «Ховар»/.  Соли 2021 мувофиқи раддабандии Агентии давлатии назорат дар соҳаи маориф Донишгоҳи давлатии тиҷорати Тоҷикистон  миёни муассисаҳои таҳсилоти олии касбӣ ҷойи ҳафтумро ишғол намуда, ба даҳгонаи мактабҳои олии беҳтарини ҷумҳурӣ шомил гардид.

Дар ин бора  имрӯз зимни нишасти матбуотӣ ректори Донишгоҳи давлатии тиҷорати Тоҷикистон Маҳмадалӣ Қурбонзода  ба хабарнигорон иттилоъ дод.

Маҳмадалӣ Қурбонзода иброз дошт, ки аз 1  январи соли равон андозаи музди меҳнати кормандони Донишгоҳи давлатии тиҷорати Тоҷикистон ба миқдори 5 фоиз зиёд карда шуд. Инчунин омӯзгорону кормандон ва донишҷӯёне, ки дар хобгоҳи донишгоҳ  зиндагӣ мекунанд, аз пардохти маблағ барои истиқомат дар хобгоҳ озод карда шуданд.

Ба зикри мавсуф, иқдоми   мазкур бо мақсади пайравӣ ва дастгирӣ аз сиёсати иҷтимоии хирадмандона ва дурандешонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сурат гирифта, барои баланд бардоштани нуфузи эътибори олимону омӯзгорон дар ҷомеа пайваста тадбирҳои муассир андешида мешаванд.