Маркази таҳсилоти иловагии ВМКБ барои 500 нафар кӯдакону наврасон лагерҳои фароғатию таълимӣ ташкил кардааст

Июль 9, 2021 08:45

ХОРУҒ, 09.07.2021  /АМИТ «Ховар»/. Истироҳатгоҳҳои фароғатию таълимии назди Муассисаи давлатии Маркази таҳсилоти иловагӣ ва бахшҳои он дар шаҳру ноҳияҳои Вилояти Мухтори Кӯҳистони Бадахшон дарҳои худро ба рӯи кӯдакону наврасон боз намуданд. Дар баробари бозиҳои варзишӣ ба истироҳаткунандагон ҳамарӯза намоиши филмҳои кутоҳи ҳуҷҷатию бадеӣ аз ҳаёти кӯдакон, барномаҳои консертӣ, озмуну викторинаҳо, маҳфилҳои шоҳмоту расмкашӣ баргузор мекунанд. Ҳоло дар ин  истироҳатгоҳҳо зиёда аз  200 нафар  таҳсилу истироҳат мекунанд.

Сардори Маркази таҳсилоти иловагии вилоят гуфт, ки дар назди марказ айни ҳол чор шуъба ва 48 маҳфил бо фарогирии беш аз 1200 нафар хонанда амал мекунанд.

“Бо мақсади  хушу гуворо ва самараноку фоидабхаш пушти сар кардани рӯзҳои таътил ҳамасола Маркази таҳсилоти иловагӣ барои хонандагон лагерҳои фароғатию таълимӣ ташкил мекунад. Дар баробари фароғат дар ин ҷо ба рушди зеҳнию маърифатӣ, эҷодкорию навоварии кӯдакону наврасон низ аҳамияти ҷиддӣ медиҳанд. Як гурӯҳи ҳунармандони наврас чанд рӯз боз дар боғчаи назди марказ саҳначаеро аз ҳаёти ҳайвонот барои намоиш омода месозанд”,-афзуд ӯ.

Номбурда тазаккур дод, ки “саҳнача аз панду ҳикматҳои ҷолиб, имову ишораҳои шавқовар иборат аст ва дорои ҷанбаҳои гуногуни тарбиявӣ мебошад. Кӯдакон талош меварзанд, ки нақшҳои худро табиӣ, шавқангез ва муассир иҷро намоянд. Зеро қарор аст, ки дар  намоиши ин саҳнача меҳмонон аз муассисаҳои таълимӣ ва аҳли оилаашон низ ширкат варзанд. Ин саҳнача ба масъалаҳои ҳифзи муҳити зист бахшида шудааст. Зеро мавзӯи ҳифзи муҳити зист яке аз мавзӯъҳои муҳими замони муосир аст ва насли имрӯз барои муҳофизати олами набототу ҳайвонот дар оянда масъул хоҳад буд. Аз ин рӯ мо кушиш мекунем, ки ҳар яке аз инҳо аз хурдсолӣ дар бораи муҳити зист ва чӣ гуна поку тамиз нигоҳ доштани он маълумоти кофӣ дошта бошанд”.

Як гурӯҳи дигар ҳоло дар синфхона ба мутолиаи ҳикояҳои кӯтоҳи бадеӣ машғул мебошанд. Пас аз мутолиаи ҳикоя ҳар яке аз  кӯдакон мазмуну моҳияти онро бо дигарон шарик месозад ва байни худ оид ба қаҳрамонони мусбию манфии ҳикоя баҳсу мунозира баргузор мекунанд. Ба бозии шоҳмот низ кӯдакон майлу рағбати зиёд доранд.

Ногуфта намонад, ки дар байни ин шоҳмотбозони наврас ғолибони мусобиқаҳои ҷумҳуриявӣ ва ҳатто байналмилалӣ низ ҳузур доранд. Яке аз онҳо хонандаи синфи шаши литсеи Оғохон Султонназар Худоназаров аст, ки дар кишвари Амрико, дар як мусобиқаи байналмилалӣ мақоми саввумро ишғол кард.  Маҳбатшоҳзода Замир бошад, дар мусобиқаи ҷумҳуриявӣ ҷои дуюм гирифт ва ҳоло ин ду шоҳмотбоз баъзе аз тарзу усулҳои ин риштаи варзишро ба ҳамсолони худ ёд медиҳад.

Дар назди Маркази таҳсилоти иловагии вилоят шуъбаҳои «Чароғи маърифат», ҳамчунин «Сайёҳӣ», «Ихтирокорони наврас ва эҳёи ҳунарҳои мардумӣ» амал мекунад, ки ҳар яке аз инҳо дар назди муассисаҳои таълимӣ истироҳатгоҳҳои мавсимӣ роҳандозӣ намуда, барои ҷолибу шавқовар ва манфиатбахш сипарӣ намудани таътили тобистона саъю талош мекунанд.

 Аксҳо аз АМИТ «Ховар»

Июль 9, 2021 08:45

Хабарҳои дигари ин бахш

«Ҷойгоҳи зан дар даврони Истиқлол»-таҳти чунин унвон дар Левакант конфронси ҷумҳуриявӣ доир гардид
Имрӯз дар ноҳияҳои кӯҳии Тоҷикистон ҳаво то 33 дараҷа гарм мешавад
Ҳунарҳои мардумӣ бо усули «хона ба хона» ва «маҳалла ба маҳалла» тарғиб карда шуданд
Дар ноҳияи Муъминобод 26 китобхона фаъолият менамояд
Имрӯз дар шаҳри Душанбе ҳаво то 36 дараҷа гарм мешавад
Бахшида ба 80-солагии таъсиси Созмони Милали Муттаҳид конфронси илмӣ-амалӣ доир шуд
Даври дуюми Фестивал-озмуни «Андалеб-2025» дар ноҳияи Рӯдакӣ аз рӯйи 12 номинатсия доир шуд
Дар ноҳияи Ёвон хонандагону омӯзгорон суханронии Сарвари давлатро ба муносибати Рӯзи дониш ва Дарси сулҳ тамошо карданд
Дар муассисаҳои таълимии вилояти Суғд соли нави таҳсил бо тамошои суханронии Пешвои миллат ба муносибати Рӯзи дониш оғоз гардид
Дар Истаравшан татбиқи Лоиҳаи «Фаъолият дар самти таъмини амнияти озуқавории Тоҷикистон» баррасӣ гардид
Имрӯз дар водиҳои Тоҷикистон ҳаво то 40 дараҷа гарм мешавад
34 СОЛИ ПУР АЗ САМАР. Мулоҳизаҳои директори Маркази тадқиқоти стратегӣ доир ба таҳкими Истиқлолияти давлатии Тоҷикистон