НИШАСТИ МАТБУОТӢ: 11 нафар қарздорон дар гузаргоҳҳои сарҳадӣ дастгир гардида, маблағҳои қарзӣ аз онҳо ситонида шуд

ДУШАНБЕ, 16.06.2021. /АМИТ «Ховар»/. Аз ҷониби иҷрочиёни мақомоти иҷро бо анҷом додани амалҳои иҷрои маҷбурӣ вобаста ба иҷрои санадҳои судӣ ба манфиати шахсони ҳуқуқӣ 341 ҳуҷҷати иҷроро ба маблағи умумии 81,1 млн сомонӣ, 1,3 млн доллари ИМА, 3,4 млн рубли Федератсияи Россия рӯёнидаанд, ки назар ба ҳамин давраи соли 2020 77 ҳуҷҷати иҷро ба маблағи 53,8 млн сомонӣ ва 1 млн доллари ИМА барзиёд ба манфиати шахсони ҳуқуқӣ рӯёнида шудааст. Дар ин бора имрӯз, 16 июл муовини аввали  Сардори Хадамоти иҷрои назди Ҳукумати Ҷумҳурии Тоҷикистон Юсуфҷон Юсуфзода зимни нишасти матуботии ниҳодашон ба хабарнигорон иттилоъ дод.

Ҳамзамон мудири бахши пешбурди феҳристи қарздорон ва махзани электронии Хадамоти иҷро Назирҷон Насимӣ зикр намуд, ки дар бораи тартиби баҳисобгирӣ, пешбурди махзани маълумот, мубодилаи иттилоот ва назорат дар низоми “Идоракунии раводид ва сарҳад” ба махзани низоми ягонаи идоракунии сарҳад ва раводид ҷиҳати баромада нарафтани қарздорон аз ҳудуди Ҷумҳурии Тоҷикистон нисбат ба 1167 нафар қарздорон маҳдудият гузошта шуда, кор дар ин самт ҷоннок гардид. 11 нафар қарздорон дар гузаргоҳҳои сарҳадӣ дастгир шуда, маблағҳои қарзӣ аз онҳо ситонида шудаанд.

Ёдовар мешавем, ки дар ин давра иҷрочиёни мақомоти иҷро нисбат ба 247 нафар қарздорон барои сари вақт напардохтани маблағи алимент ва пинҳон кардани суроғаи ҷои зисташон ҷиҳати эълон намудани кофтуков ба  судҳо пешниҳод ирсол намудаанд, ки нисбат ба 181 нафари онҳо кофтуков эълон гардида, 66 пешниҳод дар марҳилаи баррасӣ қарор доранд.