Соли равон аз «Амонатбонк» бештар тоҷирону кишоварзон ва саноатчиён қарз гирифтаанд

ДУШАНБЕ, 21.07.2021 /АМИТ «Ховар»/. Бонки давлатии амонатгузории Ҷумҳурии Тоҷикистон «Амонатбонк» аз афзоиш ёфтани маблағҳои қарзие, ки ба муштариён пешниҳод мегарданд, хабар медиҳад. Раиси Бонки давлатии амонатгузории Ҷумҳурии Тоҷикистон «Амонатбонк» Сироҷиддин Икромӣ имрӯз дар ҷамъи хабарнигорон  дар Душанбе гуфт, ки  дар натиҷаи амалӣ намудани якчанд иқдомҳо имсол «Амонатбонк» аз ҳисоби  захираҳои дохилию  хориҷӣ  ба зиёда аз 36 ҳазор муштарӣ беш аз 661,9 миллион сомонӣ маблағҳои  қарзӣ пешниҳод намудааст, ки  нисбат ба ҳамин давраи соли сипаригардида  ба андозаи  36,7 ва 23 фоиз  афз удааст.

Сироҷиддин Икромӣ афзуд, ки аз қарзҳои додашудаи «Амонатбонк»  22,4 фоиз ба  соҳаи саноат,  19,9 фоиз ба бахши кишоварзӣ,  18,2 фоиз ба  бахши истеъмолӣ, 7,2 фоиз ба сохтмон,  22,7 фоиз ба тиҷорат,  7,3 фоиз  ба нақлиёт ва ба дигар хизматрасониҳо, аз қабили сайёҳӣ, тандурустӣ, хӯроки умумӣ 2,3 фоиз рост меояд.

Дар марҳилаи кунунӣ  пешниҳоди қарзҳои  «Амонатбонк»  ба муштариён дар доираи  аз 18 то 24 фоизи  солона бо пули миллӣ ва аз 10 то 12 фоизи  солона бо асъори хориҷӣ  муайян карда шудааст.