Зиёда аз 200 нафар хонандагони мактабҳои Хоруғ дар лагерҳои академӣ ба таълиму истироҳат фаро гирифта шудаанд

Июль 24, 2021 09:05

ХОРУҒ, 24.07.2021 /АМИТ «Ховар»/. Литсеи Оғохони шаҳри Хоруғ барои 80 нафар хонандагон, ки ба омӯзиши фанҳои табиатшиносӣ, дақиқ ва риёзӣ шавқу ҳаваси бештар доранд, лагери академӣ боз намуд.

Тавре мухбири минтақавии АМИТ “Ховар” дар Вилояти Мухтори Кӯҳистони Бадахшон хабар медиҳад, дар ин лагер бо истифода аз технологияи муосири коммуникатсионӣ ва бозиҳои гуногуни зеҳнию маърифатӣ ба кӯдакону наврасон фанҳои риёзӣ, физика, география ва математикаи зеҳнӣ меомӯзанд.

Ба гуфтаи роҳбари лагери академӣ Ислом Душанбиев, “барои он ки фанҳои дақиқро дурусту комил аз худ кунӣ, омӯзиши ин фанҳоро набояд мавқуф гузорӣ. Бахусус дар овонию кӯдакию наврасӣ, ки ҳанӯз зеҳну ҳофиза қавӣ ва вақту шароит мусоид аст, бештар ба омӯзиши ин гуна фанҳо шуғл варзидан зарур аст. Дар давраи таътили тобистона, ки бештар аз ду моҳ давом мекунад, хонандагон дар баробари истироҳат ду ё се соати вақти худро ҳатман бояд барои мутолиаи китоб ва ё ҳалли масъалаву муодилаҳои математикӣ ҷудо кунанд. Бартарии чунин лагерҳо дар он аст, ки шогирдонашон аз аввали рӯзҳои соли нави таҳсил зуд вориди мавзӯъ ва мундариҷаи фанҳои дарсӣ гардида, нисбат ба дигар ҳамсолони худ на танҳо дар  дарсҳо, балки дар озмуну олимпиадаҳои фаннӣ низ пешсаф хоҳанд шуд”.

Мудири шуъбаи маорифи шаҳри Хоруғ Атобек Шукурбеков гуфт, ки “зиёда аз 100 хонандаи муассисаҳои таълимии шаҳр низ ба лагерҳои академии ноҳияҳои Рӯшону Шуғнон фиристонида шуданд. Ба фарқ аз лагери академии назди литсеи Оғохон ин лагерҳо шабонарӯзӣ фаъолият мекунанд ва дар лаҳзаҳои фориғ аз бозиҳои зеҳнию варзишӣ ба омӯзиши фанҳои табиатшиносию дақиқ машғул мешаванд. Ба илмҳои дақиқ ҷалб намудани таваҷҷуҳи хонандагон аз муассисаҳои таҳсилоти умумӣ оғоз мегардад, ба шарте, ки дар он муассиса омӯзгори баландихтисос ва соҳибтаҷриба фаъолият намояд. Танҳо омӯзгори боистеъдод метавонад завқи хонандагонро ба фанҳои дақиқ бедор созад ва онҳоро бовар кунонад, ки илмҳои дақиқ то кадом андоза барои ояндаашон ва ҳам рушди босуботи кишвар чӣ қадар муҳим мебошанд”.

Ин аст, ки Пешвои миллат дар мулоқоту суҳбатҳояшон бо кормандони соҳаи маориф  пайваста таъкид мекунанд, ки «имрӯз бе илму инноватсия, технологияҳои иттилоотиву коммуникатсионӣ ва ташаккули ҷаҳонбинии техникӣ қадаме ба пеш гузошта намешавад».

Кормандони соҳаи маорифи шаҳри Хоруғ низ бо истифода аз имконоту захираҳои мавҷуда саъю талош доранд, ки дар амалисозии барномаи «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» нақши арзанда гузоранд.

Аксҳо аз АМИТ «Ховар»

Июль 24, 2021 09:05

Хабарҳои дигари ин бахш

Бо ташаббуси Агентии ҳифзи мероси таърихию фарҳангӣ дар ноҳияи Ховалинг Рӯзи Ваҳдати миллӣ ҷашн гирифта шуд
Шоири халқии Тоҷикистон Камол Насрулло: «Ҳақиқат ин аст, ки Пешвои миллат ваҳдатро бунёд гузошту таҳким доду қавӣ сохт»
Дар Осорхонаи миллӣ гӯшаи доимоамалкунандаи «Ваҳдати миллӣ» ташкил гардидааст
Тамоми комёбиҳои миллат ва саодати рӯзгори мардум аз иттиҳоди миллӣ ибтидо мегирад
«ЭМОМАЛӢ РАҲМОН – МЕЪМОРИ СУЛҲУ ВАҲДАТ». Дар Вазорати фарҳанг ҳамоиши илмӣ доир гардид
Таҳти унвони «Қисса ва ҳикояҳо» китоби Абдурофеъ Рабизода нашр гардид
«ДАР МЕҲМОНИИ ДУШАНБЕ». Фестивали байналмилалии эҷодиёти бадеии кӯдакон ва наврасони ИДМ оғоз гардид
Дар Агентии ҳифзи мероси таърихию фарҳангӣ таҳти унвони «Ваҳдати миллат — бақои миллат!» ҳамоиш баргузор шуд
Дар ёдгории Ҳалқаҷари ноҳияи Хуросон бозёфти нодири таърихӣ — «обкӯзаи хонуми Сагкин» кашф гардид
«Душанбе — нусхае аз биҳишт». Таҳти ин унвон дар васфи пойтахти Тоҷикистон китоб ба нашр расид
Донишҷӯдухтарони Донишгоҳи давлатии Кӯлоб ба меҳмонони хориҷӣ либосҳои миллиро намоиш доданд
Дар Институти биологии Помир озмоишгоҳи биотехнологӣ ба истифода дода шуд