30-СОЛАГИИ ИСТИҚЛОЛИЯТИ ДАВЛАТИИ ТОҶИКИСТОН. Чорабиниҳои асосии ҷашнӣ дар Душанбе баргузор мешаванд

ДУШАНБЕ, 07.09.2021 /АМИТ  «Ховар»/. Имрӯз чорабиниҳои асосии таҷлили 30-юмин солгарди Истиқлолияти давлатии Тоҷикистон, ки дар Душанбе баргузор мешаванд, бо паради ҳарбӣ дар майдони марказии «Дӯстӣ»-и пойтахт оғоз ёфтанд.

Дар гузашти низомӣ Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дигар шахсони баландпояи кишвар иштирок намуданд.

Зиёда аз 30 ҳазор нафар сарбозону афсарони тоҷик бо раҳпаймоии идона аз хиёбони Рӯдакӣ гузаштанд.

Субҳи фардо дар Маҷмааи давлатии «Кохи Борбад» маҷлиси тантанавӣ бахшида ба 30-юмин солгарди Истиқлолияти давлатии Ҷумҳурии Тоҷикистон баргузор мешавад, ки дар он Президенти мамлакат муҳтарам Эмомалӣ Раҳмон иштирок ва суханронӣ менамоянд.

Субҳи 9 сентябр дар майдони марказии «Дӯстӣ»-и пойтахт роҳпаймоии осоишта ва бегоҳ дар Муассисаи давлатии «Наврӯзгоҳ» намоиши театрикунонидашудаи «Сӣ ситораи дурахшон» бахшида ба 30 -юмин солгарди истиқлолияти мамлакат баргузор мешаванд.

Дар ин чорабиниҳо низ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон иштирок мекунанд.

АКС: Хадамоти матбуоти Президенти ҶТ/АМИТ «Ховар»