Дар Душанбе оид ба тарғиби ғановати маънавӣ ва таҳаммулпазириву инсондӯстӣ ҳамоиши маърифатӣ доир шуд

ДУШАНБЕ, 27.11.2021. /АМИТ «Ховар»/. Бо ибтикори мақомоти иҷроияи ҳокимияти давлатии шаҳри Душанбе 26 ноябр дар Муассисаи давлатии таълимии «Донишкадаи давлатии фарҳанг ва санъати Тоҷикистон ба номи Мирзо Турсунзода»  ҳамоиши тарғиботӣ-маърифатӣ баргузор гардид, хабар медиҳад АМИТ «Ховар» бо истинод ба ДДФСТ.

Дар ҳамоиш муовини раиси шаҳри Душанбе Мавсума Муинӣ, сардори Раёсати кор бо ҷавонон ва варзиши шаҳри Душанбе Шаҳзод Раҳимзода, директори Муассисаи давлатии «Телевизиони Душанбе» Маъруф Оқилов ва доираи васеи устодону донишҷӯёни донишкада иштирок намуданд.

Муовини Раиси шаҳри Душанбе Мавсума Муинӣ оид ба мавзӯъҳои ташаккули малакаи тарзи ҳаёти солим, ғановати маънавӣ, таҳаммулпазириву инсондӯстӣ, ҳифзи солимии моддиву маънавии оила, фард ва ҷомеа аз хатару таҳдидҳои номатлуби иҷтимоӣ, бемориҳои сироятӣ, терроризму ифротгароӣ, исрофкорӣ ва фасоди ахлоқӣ, таҳкими андешаи солим, масъулият ва рисолати инсонӣ дар иртибот ба рушди маънавии ҷомеа ибрози андеша намуд.

Мавсуф гуфт, ки рӯ овардан ба сиёсати ҷавонон тақозои таърих ва назари хирадмандонаю ҷавонпарваронаи Пешвои миллат, Президенти кишвар муҳтарам Эмомалӣ Раҳмон мебошад.

«Ҷавонони мо бояд ҳисси баланди миллию фарҳангӣ дошта, пояҳои давлатдории миллиро ҳамчун гавҳари ноёб эҳтирому нигоҳ дошта, роҳнамоиҳои созандаи Пешвои миллатро сармашқи зиндагиномаи худ қарор диҳанд. Пайваста бо меҳри Ватан, миллат, давлати соҳибистиқлоли худ ва забону фарҳанги миллии хеш ифтихор намуда, барои ҳимояи дастовардҳои Истиқлолияти давлатӣ, якпорчагии марзу буми он ҳамеша омода бошанд»,-гуфт муовини Раиси шаҳр.

Зикр шуд, ки ҷавонони сарбаланду ватандӯсти пойтахт ва ҳар фарди бонангу номус минбаъд низ анъанаҳои неки бунёдкориву созандагии Ватани муқаддасамонро идома бахшида, бо сарҷамъиву муттаҳидӣ таҳти ливои зафарпешаи Тоҷикистон барои пешрафти Тоҷикистони соҳибистиқлол ва ободонии пойтахти он саҳми босазо мегузоранд.

Директори Муассисаи давлатии «Телевизиони Душанбе» Маъруф Оқилов нақши шабакаҳои телевизиониро дар тарғиби сиёсати фарҳангпарварона ва одилонаи Пешвои миллат муассир номида, аз марҳилаҳои рушди онҳо дар солҳои соҳибистиқлолии кишвар ёдовар шуд. Ӯ иброз дошт, ки худ хатмкардаи донишкадаи мазкур буда, муассиса дар таъмин намудани шабакаҳои телевизионии кишвар ба мутахассисони соҳа ҳамасола нақши босазо мегузорад.

Ба иттилои сардори Раёсати кор бо ҷавонон ва варзиши шаҳри Душанбе Шаҳзод Раҳимзода, тамоми нобасомониҳои фардиву иҷтимоӣ, аз қабили пошхӯрии оилаҳо, нобаробариҳои иҷтимоӣ, беадолатию ноамнӣ, ҳасадхўрӣ, бемориҳои сироятӣ, каҷравиҳои ахлоқӣ аз ҷумлаи осебҳои хурду бузурги иҷтимоӣ дар замони ҷаҳонишавӣ мебошанд, ки сабаби асосии пайдоиши онҳо исрофкорӣ, ғофил мондан аз арзишҳои маънавӣ ва риоя накардани усулҳои ахлоқӣ мебошад.

Пас аз суханрониҳои гурӯҳи таблиғотӣ миёни онҳо ва устодону донишҷӯёни донишкада муколамаи озоду самимона сурат гирифт.

АКСҲО: ДДФСТ