Маҳмадтоир Зокирзода бо Сафири Шоҳигарии Британияи Кабир дар Тоҷикистон мулоқот намуд

ДУШАНБЕ, 25.11.2021 /АМИТ «Ховар»/. Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода  бо Сафири Фавқулода ва Мухтори Шоҳигарии Британияи Кабир ва Ирландияи Шимолӣ дар Ҷумҳурии Тоҷикистон Тимоти Айдан Маршалл Ҷонс мулоқот намуд. Дар ин бора котиби матбуоти Маҷлиси намояндагон Муҳаммадато Султонов ба АМИТ «Ховар» хабар дод.

Маҳмадтоир Зокирзода иброз намуд, ки Маҷлиси намояндагони Маҷлиси Олии Ҷумҳурии Тоҷикистон аз рушди робитаҳои байнипарлумонии худ бо кишвари Шоҳигарии Британияи Кабир изҳори қаноатмандӣ намуда, нақши парлумонҳоро дар пешбурди муносибатҳои бисёрҷониба ва татбиқи ҳадафҳои рушди устувор баланд арзёбӣ менамояд.

«Дар Маҷлиси намояндагон гурӯҳҳои дӯстӣ ва ҳамкории Маҷлиси намояндагони Маҷлиси Олии Ҷумҳурии Тоҷикистон бо Палатаи обшинаҳои Шоҳигарии Англия бо Ассамблеяи (Парламенти) Ирландияи Шимолӣ ва Парламенти Шотландия дар алоҳидагӣ амал ва фаъолият менамоянд. Итминон дорам, ки бо ҷоннок ва фаъол намудани  гурӯҳҳои дӯстии байни парлумонҳо бо талошҳои муштарак ҳамкории мутақобилан судманди худро ба сатҳи сифатан нав мебардоранд»,-афзуд  Маҳмадтоир Зокирзода.

Раиси Маҷлиси намояндагон тазаккур дод, ки Ҷумҳурии Тоҷикистон ба масъалаи барқарор ва рушду тавсеаи муносибатҳои дӯстона бо кишварҳои аврупоӣ, ки давлати Британияи Кабир ва Ирландияи Шимолӣ дар байни онҳо мақоми хосса дорад, таваҷҷуҳи зиёд зоҳир менамояд.

Дар мулоқот ҳамчунин таъкид гардид, ки миёни ду кишвар барои таъмиқи минбаъдаи ҳамкории амалӣ заминаи хубе бунёд гардида, аз ҳама муҳим – сатҳи баланди мушорикат ва эътимоди тарафайн ва эҳтиром ба даст омадааст.

АКС: МН МО ҶТ