Сулаймон Султонзода: Эмомалӣ Раҳмон мақоми Президентиро ба ниҳоди наҷотдиҳандаи давлат ва сарҷамъии миллат табдил доданд
![](https://khovar.tj/wp-content/uploads/2021/11/Korrupsiya-3.jpg)
ДУШАНБЕ, 16.11.2021 /АМИТ «Ховар»/. Дар раванди фаъолият дар мансаби Президенти Ҷумҳурии Тоҷикистон муҳтарам Эмомалӣ Раҳмон мақоми Президентиро ба ниҳоди наҷотдиҳандаи давлат ва сарҷамъии миллат табдил доданд. Ин нуктаро имрӯз Директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон Сулаймон Султонзода зимни ҷамъомад бахшида ба таҷлили Рӯзи Президент тазаккур дод, хабар медиҳад АМИТ «Ховар».
Дар ҷамъомад кормандони Агентӣ ва муовини Вазири фарҳанги Ҷумҳурии Тоҷикистон Давлат Сафарзода иштирок доштанд.
Зимни ҷамъомад директори Агентӣ Сулаймон Султонзода зикр намуд, ки аз ҷониби мардуми сарбаланду хештаншиноси тоҷик дар шакли «Ҷумҳурии Президентӣ» қабул карда шудани низоми идоракунии давлатдории Тоҷикистон маҳсули сабақҳои таърихӣ ва натиҷагириҳо аз самараи фаъолияти давлатдории гузашта ва имрӯзаи мо ба ҳисоб меравад.
«Хушбахтона, гузаштан ба низоми идоракунии Президентӣ на танҳо боиси наҷоти давлату миллат, балки омили рушди устувори тамоми соҳаҳои идораи давлатӣ, аз ҷумла иқтисодиёт, сиёсат, фарҳанг, маориф ва дигар соҳаҳо гардид», — гуфт директори Агентӣ.
Дар идома ӯ тазаккур дод, ки мафҳуми истилоҳи «Президенти Ҷумҳурии Тоҷикистон» бо шахсият ва хидматҳои бузургу шоистаи Пешвои муаззами миллат муҳтарам Эмомалӣ Раҳмон пайвастагии ногусастанӣ дорад.
«Зеро таърих гувоҳ аст, ки дар раванди фаъолият дар мансаби Президенти Ҷумҳурии Тоҷикистон муҳтарам Эмомалӣ Раҳмон мақоми Президентиро ба ниҳоди наҷотдиҳандаи давлат ва сарҷамъии миллат табдил доданд», — таъкид намуд С. Султонзода.
Ҳамзамон директори Агентӣ бо бовари комил иброз намуд, ки кормандони мақомоти назорати давлатии молиявӣ ва мубориза бо коррупсияи Ҷумҳурии Тоҷикистон ҳамчун сокинони бошарафи ин сарзамини муқаддас бо Ватани соҳибистиқлол, Сарвари маҳбуб ва Пешвои миллат, Президенти Ҷумҳурии Точикистон муҳтарам Эмомалӣ Раҳмон ифтихор карда, бо фаъолияти намунавори хизматӣ дар рушду нумуъ ва шукуфоии Ватани азиз саҳми босазо хоҳанд гузошт.
Дар идома муовини Вазири фарҳанги Ҷумҳурии Тоҷикистон Давлат Сафарзода доир ба хизматҳои шоистаи Президенти Ҷумҳурии Точикистон муҳтарам Эмомалӣ Раҳмон дар ҷодаи эҳёи давлати тоҷикон, барқарории сулҳ, сарҷамъ кардани миллати тоҷик, ваҳдати миллӣ ва дигар хизматҳои шоёни ин абармарди таърихӣ тариқи назму наср ибрози андеша намуд.
Дар ҷамъомад кормандони Агентӣ оид ба аҳамияти муҳими таърихӣ доштани ин сана дар ҳаёти мардуми шарифи Тоҷикистон маърӯзаҳои пурмуҳтаво карданд.
Дар фарҷом аз ҷониби Давлат Сафарзода ба як зумра кормандони Агентӣ китобҳои «Ҷасорати бузурги Пешвои миллат» ва «Назаркарда», ки ба ҳаёт ва фаъолияти Президенти мамлакат муҳтарам Эмомалӣ Раҳмон бахшида шудаанд, тақдим гардиданд.
АКСҲО: Агентии назорати давлатии молиявӣ ва мубориза бо коррупсияи ҶТ