Бахшида ба Соли нави мелодӣ дар Сирки давлатӣ ва театрҳо намоишҳои кӯдакона доир мешаванд
ДУШАНБЕ, 25.12.2021 /АМИТ «Ховар»/. Ба таваҷҷуҳи дӯстдорони санъати ҳунарии сирк расонида мешавад, ки аз 30 декабри соли 2021 то 23 январи соли 2022 дар Сирки давлатии Тоҷикистон бо иштироки ҳунармандони ИДМ ва ҳунарманди Тоҷикистон Вафо Изатуллоев (бо хирсҳояш) барномаи фарҳангиву фароғатӣ баргузор мегардад, иттилоъ дод ба АМИТ «Ховар» роҳбари бадеии Сирки давлатии Тоҷикистон Мастона Собирзода.
Мавсуф зикр намуд, ки як ҳафта инҷониб ҳунармандон аз давлатҳои Қирғизистон, Қазоқистон ва Федератсии Русия барои тамрин дар Тоҷикистон ҳурзур доранд. Барномаи солинавӣ аз намоишҳои гимнастҳо бо лассо, гимнастҳо бо ҳалқа, дорбозҳо, намоишҳо бо ҳайвонҳои ромшуда ва масхарабозон иборат аст.
Ҳамчунин бо фарорасии соли нави мелодӣ театрҳои давлатии мамлакат дари худро боз намуда, ҳаводорони ҳунари асилро ба тамошои намоишҳои идона, инчунин намоишҳои кӯдакона даъват менамоянд.
Театри академии драмавии ба номи Абулқосим Лоҳутӣ намоиши «Пайкори миллат»-ро дар таҳияи коргардон Ибодуллои Машраб ба саҳна гузоштааст. Ҳамчунин то 31 январ барномаи солинавӣ барои хурдсолон ва наврасон ба саҳна гузошта мешавад.
Роҳбари бадеии Театри давлатии лӯхтаки шаҳри Душанбе Наргис Розиқзода дар суҳбат бо хабарнигори АМИТ «Ховар» иброз намуд, ки «намоишҳои театри мо аз 11 декабр оғоз гардиданд. Имсол ҳунармандони театр нахустнамоиши солинавии «Туҳфаи палангҳои солинавӣ»-ро бо забонҳои тоҷикӣ ва русӣ пешкаши кӯдакон ва наврасон мегардонанд. Дар намоиши мазкур кӯдакону наврасон имкон доранд бо Бобои барфӣ, палангҳои хандаовар ва дигар қаҳрамонҳои афсонавӣ вохӯранд».
Театри давлатии лӯхтаки шаҳри Душанбе нақша дорад, ки дар таътили зимистона низ намоишҳои ҷолиб ба саҳна гузорад.
Ҳунармандони Театри давлатии академии опера ва балети Тоҷикистон ба номи Садриддин Айнӣ имсол барномаи солинавӣ барои хурдсолон- операи «Хусрав ва Ширин» ва дигар намоишҳои театриро манзури кӯдакону наврасон мегардонанд.
Чиптаҳо барои тамошои намоишҳо ҳамарӯза дар назди театрҳо ба фурӯш гузошта шудаанд.
Ёдовар мешавем, ки солҳои қаблӣ барномаҳои солинавӣ дар сатҳи баланд ва бо баргузории барномаҳои фарҳангиву фароғатӣ, намоишҳои театрии оммавӣ доир мегардиданд. Имсол бо мақсади пешгирӣ аз интиқоли бемории сироятии COVID–19, эмин нигоҳ доштани саломатии сокинону меҳмонони пойтахт ҷиҳати иҷрои қарори Ситоди ҷумҳуриявӣ оид ба пурзӯр намудани чораҳои зиддиэпидемиявӣ барои пешгирии интиқолу паҳншавии бемории сироятии COVID-19 дар шаҳри Душанбе барномаи бошукӯҳи фарҳангию фароғатӣ гузаронида намешавад.
Фирӯза ДАВЛАТЗОДА,
АМИТ «Ховар»
АКС аз бойгонии АМИТ «Ховар»
Дар шаҳри Душанбе бо мақсади муаррифии дастовардҳои Тоҷикистон дар самти эҳёи ёдгориҳои таърихӣ ҳамоиш доир шуд
Дар деҳаи Фатмеви ноҳияи Айнӣ муассисаи таълимӣ бунёд карда мешавад
35-СОЛАГИИ ИСТИҚЛОЛИ ДАВЛАТӢ. Барои сазовор таҷлил намудани ин ҷашни миллӣ машварати корӣ доир шуд
«Истиқлоли Тоҷикистон ва эҳёи пайвандҳои таърихию фарҳангии мардумони ориёитабор». Дар ин мавзуъ ҳамоиши илмӣ баргузор мешавад
35-СОЛАГИИ ИСТИҚЛОЛИ ДАВЛАТӢ. Бо иштироки кормандони вазорату идораҳо дар Душанбе ҳашари ободонӣ ва тозакорӣ баргузор шуд
Судяҳои Тоҷикистон дар Остона дар конфронси байналмилалӣ иштирок намуданд
ИСТИФОДАИ САМАРАНОКИ ЗАМИН. Сокини ноҳияи Ҷайҳун дар замини наздиҳавлигияш киштро барои ҳосили дуюм оғоз намуд
Имкониятҳои сайёҳии Тоҷикистон дар 14-умин Намоишгоҳи байналмилалии сайёҳии Макао муаррифӣ мегарданд
Нақшаи даъвати баҳории шаҳрвандони Тоҷикистон ба сафи Қувваҳои Мусаллаҳ беш аз 80 фоиз иҷро гардид
Ҳайати Тоҷикистон дар ҷаласаи Гурӯҳи кории минтақавӣ оид ба моликияти зеҳнӣ иштирок намуд
Вакилони парлумонҳои кишварҳои аъзои ИДМ тарҳи таҳрири нави қонуни намунавии «Дар бораи мақоми ваколатдори ҳуқуқи инсон»-ро тасдиқ намуданд
Дар Хуҷанд сеюмин Фестивал-намоишгоҳи байналмилалии донишгоҳҳои давлатҳои хориҷӣ дар Ҷумҳурии Тоҷикистон – 2026 баргузор гардид
