ОГОҲИИ АГЕНТИИ ОБУҲАВОШИНОСӢ: Шабонарӯзи наздик дар қисмати бештари ноҳияҳои кӯҳии Тоҷикистон ҳавои сард дар назар аст

Декабрь 30, 2021 16:14

ДУШАНБЕ, 30.12.2021 /АМИТ «Ховар»/. Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба таваҷҷуҳи сокинон ва меҳмонони мамлакат мерасонад, ки бино ба маълумоти Агентии обуҳавошиносии Тоҷикистон шабонарӯзи наздик дар қисмати бештари ноҳияҳои кӯҳӣ ҳавои сард дар назар дошта шудааст. Ҳарорати ҳаво дар ин рӯзҳо то ба 10-15 дараҷа сард мешавад, дар баъзе минтақаҳо ин сардӣ то ба 17-22 дараҷа, дар шарқи ВМКБ 25-30 (дар Булункӯл то 48-50) мерасад, иттило доданд ба АМИТ «Ховар» аз маркази матбуоти Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон.

Дар робита ба ин, Кумита ба шаҳрвандоне, ки дар деҳот, ноҳияҳои кӯҳиву наздикӯҳӣ зиндагӣ мекунанд, тавсия медиҳад, кит ҳангоми гарм кардани манзил қоидаҳои бехатарии сӯхторро риоя кунанд, бо истифодаи асбоби зиёди барқӣ кори шабакаи барқро мушкил накунанд.

Инчунин тавсия дода мешавад, ки дар хонаҳои истиқоматӣ бо вуҷуди будани системаи гармидиҳӣ аз рӯи эҳтиёт захираҳои гармидиҳанда бояд дошта бошанд.

Хонаҳоро бояд гарм нигоҳ дошт, чун ин ягона паноҳгоҳ дар рӯзҳои сард аст. Пеш аз паст шудани ҳарорати хона системаҳои гармидиҳии мустақилро фаъол кунед. Барои пешгирй кардани сӯхтор аз асбоби барқӣ ва обгармкунандаҳои дастсохт худдорӣ намоед.

Ҳангоми боди сахт зери дарахтон, пояҳои сустниҳоди рекломҳо, симчӯбҳои интиқоли қувваи барқ  наистед. Онҳое, ки дар деҳот ҳаёт ба сар мебаранд, бояд ғами бехатариву амнияти чорвои худро ҳам хӯранд ва захираи кофии ғизои чорво ҳам дошта бошанд.

Роҳҳои мошингарди Душанбе — Хуҷанд, Душанбе — Рашт, Душанбе — Сангвор, Душанбе — Лахш, Душанбе – Кӯлоб — Дарвоз — Хоруғ, Хоруғ — Ишкошим, Хоруғ-Мурғоб саҳаргоҳон ва субҳгоҳон ях мебанданд, ҷо-ҷо эҳтимоли ба вуҷуд омадани барфтӯда вуҷуд дорад, ҳамчунин эҳтимоли лағзиши тарма ҳам дар ин роҳҳо кам нест.

КҲФ ва МГ ба соҳибони мошинҳои шахсӣ тавсия медиҳад, ки сари вақт чархҳои тобистонаро ба зимистона иваз кунанд. Ҳангоми ба сафар баромадан ҳатман бо худ бел, ресмону бандҳо, фонусҳо, халтаи қум, ғизои кофӣ барои муҳлати сафар дошта бошанд;

— доштани сару либоси гарм, гӯгирд ва дар обгармкун оби гарм ҳатмист;

— сари вақт дорухонаи шахсии худро дар мошин нав кунед, дар он доруҳои заруриро гузоред;

— қоидаҳои ҳаракати роҳро ҷиддан риоя намоед, ҳангоми убур аз назди мактабҳо, ҷойҳои серодам, чорроҳаҳо, пулҳо суръати ҳаракатро суст кунед;

— ҳангоми ҳаракат дар роҳҳои кӯҳӣ фасилаи байни мошинҳоро ҷиддан риоя кунед, миёни мошини худ ва мошини пеш фосилаи бештар гузоред, чун нигоҳ доштани мошин дар роҳҳои яхиву пурбарф мушкилот дорад;

— шабонгаҳон ва ё рӯзона вақте ҳаво туману торик аст, ҳаракати худ дар роҳҳоро маҳдуд намоед.

Ҳангоми рух додани ҳолатҳои фавқулода ва ё рӯйдоди нохуш шумо метавонед ба телефонҳои зерин ба навбатдори фаврии КҲФ ва МГ муроҷиат намоед: Кумита-112, 221-91-19, 223-13-11, шаҳри Душанбе – 225-44-62, 225-44-76, ВМКБ – рамз 3522 тел: 24057, 22744, вилояти Суғд — рамз 3422 тел: 51555, 57995, вилояти Хатлон– рамз 3222 тел: 23505, 27827, ноҳияҳои Кӯлоб– рамз 3322 тел: 21656, 21657, ноҳияҳои Рашт– рамз 3131 тел: 22374 ва ноҳияҳои Ҳисор– рамз 3139 тел: 26074

Кумита бо мақсади вокуниши саривақтӣ ба ҳолатҳои фавқулода ва таъмини бехатарии ҳаракат дар қитъаҳои махсусан осебпазири роҳҳои кишвар, аз қабили Майхура дар минтақаи Варзоб ва километри 72-уми шоҳроҳи Душанбе-Айнӣ,   инчунин роҳи мошингарди Душанбе — Ванҷ навбатдории шабонарӯзӣ ташкил кардааст.

Декабрь 30, 2021 16:14

Хабарҳои дигари ин бахш

Дар шаҳри Омск Форуми 5-уми сарварони ҷавони Русия ва давлатҳои Осиёи Марказӣ оғоз ёфт
Масъалаи ба такмили ихтисос фаро гирифтани табибони тоҷик дар Эрон баррасӣ гардид
Дар Душанбе масъалаи густариши ҳамкории судӣ байни Тоҷикистон ва Арабистони Саудӣ баррасӣ гардид
Барои пешгирии заҳролудшавӣ аз дуди ангишт қоидаҳои муҳими истифодаи онро бояд риоя намуд
Доктор Ҳала бинти Мазид Ат-Тувайҷирӣ: «Дар «Стратегияи дурнамои рушди Арабистони Саудӣ то соли 2030» ҳифзи ҳуқуқи инсон ҷойгоҳи хос дорад»
Тавсеи ҳамкорӣ байни мақомоти Ваколатдор оид ба ҳуқуқи инсон дар Ҷумҳурии Тоҷикистон ва Кумитаи ҳуқуқи инсони Шоҳигарии Арабистони Саудӣ баррасӣ гардид
Ҳокимияти судӣ дар Тоҷикистон такягоҳи адолат ва пояи устувори қонун аст
Пешвои миллат: «Фалсафаи ҷашни Меҳргон инсонҳоро ба адолатхоҳӣ, баробарӣ ва меҳрубонӣ ҳидоят мекунад»
Дар Душанбе Форуми ёздаҳуми миллӣ оид ба волоияти қонун доир мешавад
Вазири меҳнат, муҳоҷират ва шуғли аҳолии Тоҷикистон дар Давҳа бо роҳбари ширкати қатарии «Jusour» мулоқот намуд
Дар Маркази ҷумҳуриявии илмии ҷарроҳии дилу рагҳо шуъбаи ҷарроҳии бариатрикӣ ва герниологӣ пас аз таъмиру азнавсозӣ ба истифода дода шуд
Ҳамкории Тоҷикистону Қатар дар самти меҳнат ва шуғли аҳолӣ тақвият меёбад