Ҷаласаи маҷозии гурӯҳи кории Тоҷикистон ва Русия доир ба соҳаи кишоварзӣ сурат гирифт

ДУШАНБЕ, 20.04.2022 /АМИТ «Ховар»/. 19 апрел ҷаласаи маҷозии гурӯҳи кории  Ҷумҳурии Тоҷикистон ва Федератсияи Русия доир ба соҳаи кишоварзӣ баргузор гардид, ки дар он масъалаҳо вобаста ба соҳаи мазкур миёни ду давлат, инчунин таҳияи «Харитаи роҳ» барои мустаҳкам намудани ҳамкорӣ дар соҳаи кишоварзӣ миёни Вазорати кишоварзии Федератсияи Русия ва Вазорати кишоварзии Ҷумҳурии Тоҷикистон барои солҳои 2022-2023 мавриди музокироти ҷонибҳо қарор гирифтанд, хабар доданд ба АМИТ «Ховар» дар шуъбаи матбуот ва иттилооти Вазорати кишоварзии мамлакат.

Дар ҷаласаи корӣ  муовини Вазири кишоварзии Ҷумҳурии Тоҷикистон Нигина Анварӣ доир ба имконоти мавҷуда ва истифодаи ҳамаҷонибаи соҳаи кишоварзии мамлакат ба иштирокдорон маълумот дод.

Иштирокдорони ҷаласа фаъолияти минбаъдаи ҳамкории вазоратҳои мазкурро оид ба муомилоти маҳсулоти хоҷагиҳои деҳқонӣ, ташаккули феҳристи ширкатҳои содиркунанда, инчунин якчанд намуди маҳсулоти кишоварзӣ, ки имкони афзоиши содироти мутақобила ба бозорҳои ҳарду кишварро доранд, мавриди баррасӣ қарор доданд.

Ҷонибҳо инчунин масоили бастани шартномаҳои мустақим оид ба таҳвили ваксинаҳои байторӣ ва системаҳои ташхиси тестӣ ба Ҷумҳурии Тоҷикистон, ҳамкорӣ дар соҳаи назорати байторӣ ва фитосанитариро мавриди таҳлил қарор доданд.

АКС: Вазорати кишоварзии ҶТ