Бахшида ба Рӯзи умумиҷаҳонии ҳифзи меҳнат дар Душанбе ҳамоиш доир гардид

ДУШАНБЕ, 28.04.2022 /АМИТ «Ховар»/. Аз замони ба даст овардани Истиқлоли давлатӣ масъалаҳои таъмини ҳуқуқу кафолатҳои меҳнатии шаҳрвандон низ ҳамчун самти афзалиятноки сиёсати иҷтимоии давлати Тоҷикистон  муайян гардиданд. Новобаста аз имконияти маҳдуди молиявии давлат таъмини шуғли аҳолӣ, шароити муносиби корӣ ва пардохти музди меҳнати кормандон аз рӯзҳои аввал ҳамеша зери таваҷҷуҳи пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор доштанд. Дар Конститутсияи Ҷумҳурии Тоҷикистон аз соли 1994 ҳуқуқҳои шаҳрвандон ба меҳнат дарҷ гардидаанд. Тибқи  Конститутсия, «ҳар кас ба меҳнат, интихоби касбу кор, ҳифзи меҳнат ва ҳимояи иҷтимоӣ ҳангоми  бекорӣ ҳақ дорад. Музди кор аз ҳадди ақалли музди меҳнат набояд кам бошад. Ин нуқтаро муовини Вазири меҳнат, муҳоҷират ва шуғли аҳолии Ҷумҳурии Тоҷикистон Нурулло Маҳмадуллозода зимни ҳамоиши аъзои Кумитаи миллии сетарафа оид ба меҳнати арзанда ва дигар ҷонибҳои манфиатдор, ки 28 апрел бахшида ба Рӯзи байналмилалии ҳифзи меҳнат баргузор шуд, баён намуд.

Муовини Вазири меҳнат, муҳоҷират ва шуғли аҳолӣ иброз дошт, ки «давоми  солҳои истиқлоли давлатӣ соҳаи ҳифзи меҳнат дар мамлакати мо тадриҷан рушд карда, нишондиҳандаҳои асосии он ба маротиб афзоиш ёфтаанд».

Бояд гуфт, ки Тоҷикистон миёни ҷумҳуриҳои собиқ ИҶШС яке аз аввалин давлатҳоест, ки узви Созмони байналмилалии меҳнат шуда, конвенсия ва тавсияҳои ин ташкилоти байналмилалиро эътироф намудааст. Дар ин замина, соли 1997 нахуст Кодекси меҳнати Ҷумҳурии Тоҷикистон ҷавобгӯ ба меъёрҳои байналмилалӣ дар соҳаи меҳнат қабул гардида, аз ҷониби созмонҳои байналмилалӣ баҳои баланд гирифт. Тайи давраи Истиқлоли давлатӣ рушди соҳаҳои иқтисоди ҷумҳурӣ шаклҳои нави муносибатҳои меҳнатиро ба вуҷуд оварданд. Бо назардошти ин омилҳо соли 2016 Кодекси меҳнати Ҷумҳурии Тоҷикистон дар таҳрири нав қабул гардид.

Дар ҳамоиш аз ҷониби муовини сардори Раёсати муносибатҳои меҳнатӣ ва сатҳи зиндагии аҳолии Вазорати меҳнат, муҳоҷират ва шуғли аҳолӣ Фирӯза Ҳабибӣ лоиҳаи Барнома оид ба ҳифзи меҳнат дар Ҷумҳурии Тоҷикистонро рӯнамоӣ гардид.

Дар ҷараёни ҳамоиш иштирокдорон андешаҳои худро доир ба масоили мубрами Рӯзи ҳифзи меҳнати кормандон, аз қабили: назорат дар соҳаи ҳифзи меҳнати ҷумҳурӣ, тақвияти минбаъдаи назорати ҷамъиятии ҳифзи меҳнат, нақши иттифоқҳои касаба дар самти мазкур, таҳлили ҳодисаҳои нохуши истеҳсолӣ дар соҳаҳои саноату кӯҳкорӣ ва тадбирҳои пешгирикунандаи ҳаводиси нохуш, бемориҳои касбӣ, хусусият ва тадбирҳои пешгирикунандаи онҳо, роҳҳои ҳалли масоили соҳаи меъёрбандии меҳнат, иқтисоди рақамӣ ва масоили ҳифзи меҳнати кормандон баён доштанд.

Ёдовар мешавем, ки соли 1996 бо ташаббуси Созмони  Байналмиллалии Меҳнат расман таклиф пешниҳод гардид, ки Рӯзи умумиҷаҳонии ҳифзи меҳнат таъсис дода шавад. Барои гузаронидани ин ид 28 апрел интихоб карда шуд.

АКС: Вазорати меҳнат, муҳоҷират ва шуғли аҳолии ҶТ