Дар Восеъ довталабони хизмати аскарӣ соҳиби шаҳодатномаи ронандагӣ шуданд

ВОСЕЪ, 19.04.2022  /АМИТ «Ховар»/. Дар ноҳияи Восеъ бо мақсади ҷалб намудани ҷавонон ба сафи Қувваҳои Мусаллаҳи Тоҷикистон ва таъмин намудани шаҳодатномаи ронандагӣ аз ҷониби мактаби автомобилии Ташкилоти ҷамъиятии мададгори  мудофиа ба 44 нафар довталаби хизмати аскарӣ шаҳодатномаи ронандагӣ супорида шуд.

Сардори мактаби автомобилӣ, лейтенант Сафаралӣ  Мирзоев  ба хабарнигори АМИТ «Ховар» Сулаймон Холзода гуфт, ки 44 нафар довталаби хизмати аскарӣ дар муддати се моҳ курсҳои ронандагӣ омӯхта, бо  дараҷаҳои  «Б» ва  «С» таъмин  шуда, дар ин даъвати баҳорӣ ба қисмҳои низомӣ сафарбар карда шудаанд.

Сафаралӣ Мирзоев афзуд, ки дар мактаби автомобилӣ 4 мошини сабукрав барои машғулиятҳои амалӣ фаъолият дошта, инчунин синфхонаи махсус, ки дар он қисмҳои эҳтиётии нақлиёт мавҷуд аст, ба довталабон омӯзонида мешавад.

Довталабон ба ғайр аз омӯхтани қисмҳои эҳтиётии нақлиёт, инчунин  ба машғулиятҳои ҳарбӣ,  аз қабили  давидан,  ба қисмҳо ҷудо кардани автомат, тирпарронӣ, саф кашидан ва ғайра машғул мешаванд.

Гуфта шуд, ки айни ҳол набудани хобгоҳ ба довталабон мушкилӣ эҷод менамояд ва барои бартараф кардани ин мушкилӣ масъулини мактаб тасмим гирифтааст, ки  аз моҳи июли соли равон сохтмони хобгоҳро  оғоз намояд.

АКС аз муаллиф