Дар Душанбе ҳамоиши соҳибкорони Тоҷикистон ва Туркия баргузор гардид

Май 20, 2022 08:12

ДУШАНБЕ, 20.05.2022 /АМИТ «Ховар»/. Дирӯз дар Душанбе дар доираи ҷаласаи 11–уми Комиссияи муштараки байниҳукуматии Тоҷикистон ва Туркия оид ба ҳамкории иқтисодӣ ҳамоиши соҳибкорони Тоҷикистону Туркия баргузор гардид, иттилоъ медиҳад мухбири АМИТ «Ховар».

Раиси Палатаи савдо ва саноати Ҷумҳурии Тоҷикистон  Ҷамшед Ҷумъахонзода зимни ифтитоҳи Форум Туркияро яке аз шарикони иқтисодӣ ва тиҷоратии асосии Тоҷикистон  номида, зикр намуд, ки «иштироки ширкату корхонаҳои Туркия сол ба сол зиёд ва фаъол гардида, чорабинии имрӯза метавонад барои рушди ҳамкории иқтисодӣ ва тиҷоратии кишварҳои мо муҳим ва омили асосӣ барои тақвияти ҳамкорӣ миёни бахши хусусии ду кишвар гардад. Бо шарофати сиёсати созандаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз барои соҳибкорон ва сармоягузорон шароити хуби фаъолият ва рушд фароҳам оварда шудааст. Имрӯз тибқи қонунгузории Ҷумҳурии Тоҷикистон барои соҳибкорон имтиёз ва афзалияти зиёд дода шудааст. Ҳамчунин рушди арбитражи байналмилалии тиҷоратӣ дар кишвари мо баёнгари ҳифзи манфиатҳои соҳибкорон мебошад».

Ба ҳамоиш намояндагони 21 ширкати туркӣ аз соҳаҳои саноати сабук, мошинсозӣ, истеҳсоли техникаи кишоварзӣ, маҳсулоти кишоварзӣ, истеҳсоли мебел ва ғайра даъват шуда буданд. Аз ҷониби Тоҷикистон 100 нафар соҳибкорон аз тамоми манотиқи кишвар ширкат намуданд.

Зикр гардид, ки гардиши савдои хориҷии Ҷумҳурии Тоҷикистон бо Туркия давоми моҳҳои январ-апрели соли 2022  118,5 млн ва дар ҳамин давраи соли 2021  126,8 миллион долларро ташкил дод. Гардиши савдои хориҷии Ҷумҳурии Тоҷикистон бо Туркия давоми соли 2021 ба 390,5 миллион доллар расидааст.

Зимни чорабинӣ мавзӯъҳои Кодекси нави андози Ҷумҳурии Тоҷикистон, минтақаҳои озоди иқтисодии ҶТ, имконияти сармоягузории Тоҷикистон, имконоти коркарди пахта дар Тоҷикистон ва фаъолияти корхонаи СоСа СоIа бо муаррифии рӯнамоиҳо пешниҳоди ширкаткунандагон гардонида шуд.

Бахши дувуми форуми тиҷоратӣ дар шакли мулоқотҳои В2В баргузор шуд, ки ба соҳибкорон тоҷик имкон медиҳад бо намояндагони ширкатҳои туркӣ музокироти мустақим анҷом диҳанд.

Иттилоъ дода шуд, ки дар Ҷумҳурии Тоҷикистон 5 Минтақаи озоди иқтисодӣ фаъолият менамоянд, ки дар онҳо барои созмон додани корхонаҳои истеҳсолии муштарак ҳама гуна шароит муҳайё карда шудааст.

Ҳамоиши мазкурро Палатаи савдо ва саноати Ҷумҳурии Тоҷикистон ва Вазорати саноат ва технологияҳои нави Ҷумҳурии Тоҷикистон ташкил намудаанд.

Зикр шуд, ки ҳамоишҳои тиҷоратӣ ва намоишгоҳу ярмаркаҳо дар самти рушди тиҷорат ва ҳамкории дуҷониба нақши муҳим мебозанд.

Шаҳлои САДРИДДИН,
АМИТ «Ховар»

АКС: АМИТ «Ховар»

Май 20, 2022 08:12

Хабарҳои дигари ин бахш

РУШДИ САЙЁҲӢ. Имсол ба вилояти Хатлон беш аз 900 ҳазор сайёҳ ташриф овардааст
Раванди омодагӣ ба Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор» баррасӣ шуд
Намояндаи Тоҷикистон дар ҷаласаи Шурои байнидавлатӣ оид ба сиёсати зиддиинҳисорӣ дар Беларус иштирок намуд
Тоҷикистон ва Чин тасмим гирифтаанд, ки ҳамкориро дар соҳаи обуҳавошиносӣ тақвият диҳанд
Вазирони энергетикаи Тоҷикистон ва Эрон масъалаҳои иҷрои протоколи Комиссияи муштараки байниҳукуматиро баррасӣ намуданд
Татбиқи марҳилаи чоруми Лоиҳаи метеорологии Финляндия ва Тоҷикистон баррасӣ гардид
Ташаббусҳои глобалии Тоҷикистон дар соҳаи об дар ҷаласаи Конфронси исломии вазирони масъул оид ба масъалаҳои об дар Ҷидда баррасӣ гардид
Дар ноҳияи Восеъ иншооти таъйиноти гуногун мавриди истифода қарор гирифтанд
Ширкати чинӣ ба бунёди неругоҳҳои офтобӣ ва бодӣ дар Тоҷикистон таваҷҷуҳ зоҳир намуд
Имсол беш аз 30 ҳазор сайёҳон бо мавзеъҳои таърихии ноҳияи Восеъ шинос гардиданд
Лоиҳаи «Барномаи рушди иқтисодию иҷтимоии шаҳри Душанбе барои солҳои 2026–2030» муаррифӣ карда шуд
Имконияти содироти маҳсулоти кишоварзии Тоҷикистон ба Русия баррасӣ гардид