«Маснавии маънавӣ» дар ду шакл бо теъдоди 10 ҳазор нусха ба нашр расид

Июнь 20, 2022 11:21

ДУШАНБЕ, 20.06.2022 /АМИТ «Ховар»/. «Нашри нави «Маснавии маънавӣ» бо дарназардошти талаботи мардуми адабдӯсту фарҳангпарвари тоҷик ва бо дастгириҳои бевоситаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сурат гирифт. Ин ганҷинаи маънавӣ аз ҳисоби Фонди захиравии Президенти мамлакат пас аз таҳрири нав бо ороиши зебо пешкаши хонандагон ва дӯстдорони каломи Мавлоно мегардад», — чунин иброз намуд Вазири фарҳанг Зулфия Давлатзода 18 июн зимни маросими рӯнамоии ин асари безевол ва намоиш-фурӯши китобҳои тозанашри нашриёти «Адиб» дар Китобхонаи миллии Тоҷикистон.

Зулфия Давлатзода Ҷалолуддин Балхиро яке аз пуркортарин адибони адабиёти форсу тоҷикӣ номида, изҳор дошт, ки «нигоштаҳои килки сеҳрангези адиб, мутафаккир дар «Девони Шамс» ё «Девони кабир», «Маснавии маънавӣ», «Маҷолиси сабъа», «Фиҳӣ мо фиҳӣ» ва «Мактубот»-и ӯ фароҳам омадаанд. Пойгоҳи ин суханвар дар олами шеъру шоирӣ ончунон баланд аст, ки гурӯҳе вайро ба ҳайси бузургтарин шоири ҷаҳон, ҷамъе бузургтарин шоири адабиёти форсу тоҷикӣ эътироф намудаанд».

Тавре корманди маркази матбуоти Вазорати фарҳанг Марям Холиқзода  ба АМИТ «Ховар» иттилоъ дод, аз намоиш-фурӯш аҳли фарҳанги кишвар, адибон, устодону донишҷӯёни донишгоҳу донишкадаҳо, сокинону меҳмонони пойтахт дидан намуда, китобҳои мавриди писанди хешро бо нархҳои дастрас харидорӣ намуданд.

Дар ҷараёни маросими рӯнамои мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Масрур Абдуллозода иброз дошт, ки «маҳз дар замони истиқлол бо ибтикори Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо шахсият ва ашъори Мавлоно ошноӣ пайдо намудем. Ба нашр расидани ин шоҳасар аз Фонди захиравии Президенти Ҷумҳурии Тоҷикистон аҳамияти бузург дошта, дар тарбияи маънавии аҳли башар саҳми арзанда мегузорад. «Маснавии маънавӣ» ҳеҷ гоҳ ва дар ҳеҷ давру замон аҳаммияти худро гум накардааст ва нахоҳад кард».

«Маснавии маънавӣ» дар ду шакл: матни комили асар дар як китоб ва се қисмат дар се ҷилд, бо теъдоди 10 000 нусха аз ҷониби Муассисаи давлатии нашриявии «Адиб»-и Вазорати фарҳанги Ҷумҳурии Тоҷикистон ба нашр расид.

Муовини Вазири фарҳанги Ҷумҳурии Тоҷикистон Давлат Сафарзода аз ташаббусҳои пайвастаи Пешвои муаззами миллат муҳтарам Эмомалӣ Раҳмон дар самти нашри китобҳои адибони классику муосири тоҷик, бахусус «Маснавии маънавӣ» ёдоварӣ намуда, ба муҳаррирону мураттибони китоб барои таҳия ва омода намудани ин шоҳасар арзи сипосу миннатдорӣ кард.


Алии Муҳаммади Хуросонӣ, ки дар таҳияи ин китоб саҳми барҷаста дорад, зимни суханронӣ арзи сипосу миннатдории хешро ба Ҳукумати мамлакат, бахусус Президенти Ҷумҳурии Тоҷикистон муҳтарам Эмомалӣ Раҳмон ва Вазорати фарҳанги Ҷумҳурии Тоҷикистон барои нашри ин китоб баён намуд. Номбурда аз заҳматҳои шабонарӯзии мураттибон Мубашшири Акбарзод, Баҳриддин Ализода ёдоварӣ намуда, вобаста ба баргардонии матни форсӣ бо ҳуруфи кирилӣ мутобиқ ва фаҳмо гардонидани он барои хоанадагон ибрози андеша намуд.

Гуфта шуд, ки Ҷалолуддин Балхи шоирест нотакрор ва мутафаккирест беҳамто, ки иттиҳод, ваҳдат, ҳамбастагӣ ва эҳёи асолати миллию инсонӣ нуқтаи олии ғоявии эшонро ташкил медиҳад:

Ҳар касе, к-ӯ дур монд аз асли хеш,
Боз ҷӯяд рӯзгори васли хеш.

АКС: Вазорати фарҳанги ҶТ

Июнь 20, 2022 11:21

Хабарҳои дигари ин бахш

Ҷаласаи ситоди даври чоруми Озмуни ҷумҳуриявии «Илм – фурӯғи маърифат» баргузор гардид
Рӯзи дарҳои кушоди Академияи хурди илмҳои Тоҷикистон баргузор шуд
КИТОБ-МУАРРИФИ ДАСТОВАРДҲОИ АДИБОН. Бардошт аз баргузории Намоишгоҳи байналмилалии «Китоби Душанбе»
Байни «Тоҷикфилм» ва шаш киностудияи кишварҳои ИДМ ва хориҷи наздик Ёддошти тафоҳум ба имзо расид
Намоишгоҳи байналмилалии «Китоби Душанбе» оғоз гардид
Шоҳҷоизаи Синамоҷашнвораи дуюми байналмилалии «Тоҷи Сомон»-ро коргардони тоҷик Муҳиддин Музаффар соҳиб шуд
«КИТОБИ ДУШАНБЕ». Пагоҳ дар Душанбе намоиши сенздаҳуми байналмилалӣ оғоз мегардад
Эмомалӣ Раҳмон: «Таҷлили Меҳргон далели эҳтиром ба фарҳанги қадима ва суннатҳои созандаи миллати тоҷик аст»
Имрӯз дар Фестивали «Оши палов» намудҳои гуногуни ин таоми миллӣ омода карда шуданд
СЕБҲОИ ТОҶИКИСТОН БО ТАМЪИ ЛАЗИЗАШОН МАШҲУРАНД. Дар Душанбе Иди себ ва ангур таҷлил гардид
Дар Душанбе Иди Меҳргон ба таври тантанавӣ таҷлил гардид
Имрӯз ҷашни Меҳргон бо баргузории Фестивал-намоиши маҳсулот ва техникаи кишоварзӣ оғоз мегардад