Ширкати «IRS»: Барои таъмиру таҷдиди роҳи Душанбе-Чаноқ зиёда аз 40 ҳазор тонна асфалт харҷ мегардад

Июнь 8, 2022 12:00

ДУШАНБЕ, 08.06.2022 /АМИТ «Ховар»/. Чанде пеш мавсими нави таъмиру таҷдиди роҳи Душанбе-Чаноқ оғоз гардида, дар назар аст, ки соли равон барои ин кор зиёда аз 40 ҳазор тонна асфалт харҷ шавад. Дар ин бора ба АМИТ «Ховар» дар маркази матбуоти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон хабар доданд.

Тибқи иттилои манбаъ, аз аввали фаъолият «IRS» таъмири куллӣ ва ҷории роҳро шурӯъ карда, дар муддати 13 сол «IRS» зиёда аз 2 миллион метри квадратии роҳи Душанбе – Чаноқро таъмиру навсозӣ намуда, бо ин мақсад зиёда 230595 тонна асфалт сарф кардааст.

Агар дар фасли тирамоҳу зимистон кормандони «IRS» ба бартараф намудани тармаҳо, мунтазам тоза намудани роҳ аз барф ва коркарди он бо маводи зиддилағжиш машғул шаванд, дар мавсими гармо таъмиру таҷдиди роҳ, рафъи пайомади боришот, омадани сел, лағжиши кӯҳпора ва соҳилмустаҳкамкунӣ самти асосии фаъолияти он маҳсуб мешавад.

Ширкат тӯли 13 сол нигоҳдорӣ ва навсозии 36 кӯпруки ин масирро бо хароҷоти ниҳоят зиёд амалӣ кард. Масалан, 3 пули калон, ки дарозиии ҳар кадомаш аз 42 то 73 метр аст, пурра навсозӣ шудаанд.

Зикр гардид, ки қаблан дар масири роҳи Душанбе – Чаноқ ягон корхонаи истеҳсоли асфалт ва дигар масолеҳи сохтмонӣ барои бахши роҳсозӣ вуҷуд надошт. Тӯли 13 сол дар минтақаи Варзоб 3 завод, Зарафшон — 3, Суғд — 4 , дар маҷмӯъ, 10 корхона барои осон намудани кори роҳсозӣ мавриди истифода қарор гирифтанд.


Бо мақсади таъмини фаъолияти муназзами заводҳои мазкур харидории битум ва бо тавсеа ёфтани таъмиру навсозии роҳ, бартарафсозии тармаҳо, соҳилмустаҳкунӣ ва ғайра харидории сӯзишворӣ хеле афзуда, ҳар сол ҳаҷми зиёди ин мавод дастрас мешавад.

Кишваре, ки дар назди худ ҳадафи пешрафту тараққиётро гузоштааст, бе сохтмону навсозӣ кардан ва ба стандартҳои ҷаҳонӣ мутобиқ гардонидани шабакаҳои дохилии коммуникатсионӣ рушди муназзаму устувори худро таъмин карда наметавонад. Бозсозии роҳи Душанбе — Чаноқ, ки аз лиҳози стратегӣ моҳияти хосаро доро буда, пайвандгари ҷанубу шимоли мамлакат маҳсуб меёбад, аз ҷумлаи ибтикороти зикршуда аст. Табиист, ки роҳҳои ба тозагӣ бунёдгардида нигоҳубини мунтазамро бо истифода аз техникаву механизмҳои замонавӣ тақозо менамоянд.

Бо дарназардошти ин, Ҳукумати Ҷумҳурии Тоҷикистон нигоҳдории роҳи Душанбе – Чаноқро дар асоси шартномаи консесионӣ ба зиммаи филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон вогузор намуд. Иҷрои рисолати тибқи шартномаи консессионӣ ба зиммаашон вогузорбуда зери назорати доимӣ ва ҷиддии роҳбарияти филиали Ширкат қарор дошта, дар сурати ба вуҷуд омадани вайроншавии кӯчактарин дар масири роҳ пайи рафъи он чораҳои бетаъхир андешида мешавад.

Имсол низ чун солҳои қаблӣ муносибати масъулини филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон барои дар сатҳи хубу сифати баланд иҷро шудани ин кор ҷиддӣ буда, корхонаҳои истеҳсоли асфалт ва техникаҳои барои таъмир махсусгардонидашуда пурра омодаанд.

АКС: Маркази матбуоти филиали Ширкати саҳомии «Инновейтив Роуд Солюшнз ЛДТ» дар ҶТ

Июнь 8, 2022 12:00

Хабарҳои дигари ин бахш

Қитъаи муҳими роҳи Душанбе – Хоруғ – Қалъаихумб бо пулу нақб мавриди истифода қарор гирифт
Эмомалӣ Раҳмон: «Ба рушди Вилояти Мухтори Кӯҳистони Бадахшон зиёда аз 25 миллиард сомонӣ равона шудааст»
Дар Хадамоти гумрук моҳияти қонунҳои миллӣ тавзеҳ дода шуд
Эмомалӣ Раҳмон: «Дар Вилояти Мухтори Кӯҳистони Бадахшон амалисозии 9 барномаи рушди иҷтимоиву иқтисодӣ идома дорад»
Байни вилоятҳои Хатлони Тоҷикистон ва Ленингради Русия Созишномаи ҳамкорӣ ба имзо расид
Раҳмон Исломиддин дар ҷаласаи навбатии Шурои байнидавлатӣ оид ба стандартизатсия, метрология ва сертификатсияи давлатҳои аъзои ИДМ иштирок намуд
Дар Турсунзода Фестивали саводнокии молиявӣ баргузор шуд
Татбиқи тарҳи «CASA-1000» намунаи ҳамкории энергетики минтақавӣ мебошад
Ҷаласаи сеюми Комиссияи байниҳукуматии Тоҷикистону Ҷопон баргузор гардид
Байни «Амонатбонк» ва Федератсияи футболи Тоҷикистон шартномаи ҳамкорӣ ба имзо расид
Дар доираи ҳамкории Тоҷикистон бо Фонди байналмилалии рушди кишоварзӣ академияи бонкӣ таъсис дода мешавад
Харитаи роҳи Ҳадафи 7-уми Рушди Устувор барои Тоҷикистон расман оғоз гардид