Намояндаи Тоҷикистон дар Фестивали VI байналмилалии адабӣ ба номи Максим Горкий иштирок намуд

ТУРСУНЗОДА, 22.10.2022 /АМИТ «Ховар»/. Аз 3 то 8 октябри соли 2022 дар Нижний Новгород ва вилояти Нижегородски Федератсияи Россия Фестивали VI байналмилалии адабӣ ба номи Максим Горкий баргузор шуд, ки Ҷумҳурии Тоҷикистонро узви фаъоли Ҳизби Халқии Демократии Тоҷикистон, Раиси Шӯрои адабии Анҷумани халқҳои Авруосиё, ҳамоҳангсози миллии Ҷунбиши «Шеъри ҷаҳон – ҷаҳони бе девор», рӯзноманигор Абдуқаҳҳор Қосим намояндагӣ намуд. Дар ин бора Абдуқаҳҳор Қосим ба хабарнигори минтақавии АМИТ «Ховар» Субҳониддини МАҲМУД иттилоъ дод.

Дар фестивал 50 шоиру нависанда аз Москва, Санкт-Петербург, Кронштадт, Кемерово, Новокузнетск, Беларус, Тоҷикистон, Арманистон, Узбекистон, Эстония, Қирғизистон, Туркия ва дигар манотиқи пасошӯравӣ ширкат доштанд.

Тибқи иттилои Абдуқаҳҳор Қосим, «дар фестивал зикр гардид, ки муоширати меҳмонони фестивал бо хонандагони рус, муколама дар бораи сарнавишти забон ва адабиёти рус дар хориҷи наздик дар шароити муосир ҳамчун унсури муҳими дипломатияи ҷамъиятӣ ва фарҳангӣ ниҳоят муҳим аст. Вазири корҳои хориҷии Россия Сергей Лавров ба меҳмонон ва ширкаткунандагони ҷашнвора номаи истиқбол фиристода, таъкид кардааст, ки «ин анҷумани эҷодӣ бояд минбари муҳим барои таблиғи мероси ғании адабиёти рус, таблиғи мавқеи забони русӣ ва адабиёти рус гардад. Албатта, дар шароити ҳозира вусъати робитаҳои байналхалкию маданӣ ва гуманитарӣ ба нигаҳ доштани муҳити дӯстӣ ва боварӣ миёни халқҳо мусоидат мекунад».

Ҳамчунин дар доираи фестивал мизҳои мудаввар оид ба масъалаҳои мубрами адабиёт, вохӯриҳо бо адибону шоирон дар мактабҳо, коллеҷҳо, донишгоҳҳо, китобхонаҳо, мағозаҳои китобфурӯшӣ ва ғайра баргузор шуданд.

Ҳамсуҳбати мо гуфт, ки ӯ дар вохӯрӣ бо шунавандагон дар Донишгоҳи техникии Нижний Новгород ба номи Алексеев, китобхонаи марказии Дивеево, китобхонаи ба номи Т.Г.Шевченко, китобхонаи вилоятии ба номи В. И. Ленин, мизҳои мудаввар ва «Батли шоирон» ва ғайра иштирок намуд. “Ман зимни маърӯзаҳо дар бораи мавқеи забону адабиёт сухан намуда, ба суолҳои иштирокчиёни вохӯрӣ ҷавоб додам ва бо ду забон- русӣ ва тоҷикӣ шеърҳоямро қироат намудам”.

Евгений Ширшов, роҳбари лоиҳаи Фестивали байналмилалии адабии ба номи Максим Горкий зикр кард, ки «ҷашнвораи мо ба он нигаронида шудааст, ки шавқу рағбат ба китобхонӣ тавассути таваҷҷуҳ ба адибон инкишоф ёбад. Давоми 6 рӯзи кори фестивал зиёда аз 100 вохӯрӣ баргузор гардид. Дар ҳамаи китобхонаҳои Нижний Новгород ва 8 ноҳияи вилоят вохӯриҳо бо нависандагон ва шоирон гузаронида шуд».

Ташкилотчии Фестивали байналхалқии адабиёти ба номи Горкий, лауреати Мукофоти байналхалқии адабии ба номи Э. Хеменгуэй шоир ва нависанда Дмитрий Бурдин буда, фестивал бо дастгирии ҳукумати вилояти Нижний Новгород ва маъмурияти шаҳри Нижний Новгород баргузор шуд.

Ташкилкунандагони фестивал созмони хайрияи ҷамъиятии Нижний Новгород «Роҳи некӣ» ва Раёсати минтақавии лоиҳаҳои фарҳангию маърифатии вилояти Нижний Новгород мебошанд.

АКС аз бойгонии рӯзноманигор Абдуқаҳҳор Қосим