БА МУНОСИБАТИ 30-СОЛАГИИ ИҶЛОСИЯИ XVI ШӮРОИ ОЛӢ. Дар Академияи идоракунии давлатӣ конференсия баргузор шуд

Ноябрь 4, 2022 10:36

ДУШАНБЕ, 04.11.2022 /АМИТ «Ховар»/. 2 ноябр бахшида ба 30-солагии Иҷлосияи XVI Шӯрои Олии Ҷумҳурии Тоҷикистон дар Академияи идоракунии давлатии назди Президенти Ҷумҳурии Тоҷикистон таҳти унвони «Иҷлосияи XVI Шӯрои Олӣ: заминаҳои таърихӣ, пояи самаранокии низоми сиёсии Тоҷикистон» конференсияи илмӣ-амалии ҷумҳуриявӣ баргузор шуд, хабар доданд ба АМИТ «Ховар» дар Академия.

Дар конференсия Ректори Академияи идоракунии давлатии назди Президенти Ҷумҳурии Тоҷикистон Абдухалил Ғафурзода, вакилони Иҷлосияи XVI Шӯрои Олии Ҷумҳурии Тоҷикистон Ғайбулло Афзалов, Абдулмаҷид Достиев, узви Комиссияи марказии интихобот ва райъпурсӣ дар Ҷумҳурии Тоҷикистон Махфират Хидирзода иштирок намуданд.

Пеш аз оғози конференсия меҳмонон аз Маркази омӯзиши «Мактаби давлатдории Эмомалӣ Раҳмон» дидан намуданд.

Ректори Академияи идоракунии давлатӣ Абдухалил Ғафурзода иброз дошт, ки Иҷлосияи ХVI Шӯрои Олии Тоҷикистон, ки 30 сол қабл дар Қасри Арбоби шаҳри Хуҷанд баргузор гардида буд, рӯйдоди бузурги таърихие мебошад, ки дар таърихи давлатдории миллии тоҷикон ва таърихи навини Тоҷикистони соҳибистиқлол марҳилаи сифатан навро бунёд гузошт. Он хатари ҳамчун давлати мустақил барҳам хӯрдани Тоҷикистон ва ҳамчун миллат аз байн рафтани тоҷикони куҳанбунёдро пешгирӣ кард. Ба ёд овардани ин санаи муҳими таърихӣ, ки воқеан оғози аз вартаи ҳалокатбори ҷанги шаҳрвандӣ раҳо ёфтан ва тадриҷан ба остонаи сулҳу ваҳдат, ризоияти миллӣ ва созандагию бунёдкорӣ расидани миллати мо гардид, қарзи инсонии ҳар фарди солимфикри ҷомеа мебошад, зеро маҳз дар ҳамин иҷлосия тақдири ояндаи давлати миллии тоҷикон тарҳрезӣ гардид ва ба сӯйи ҳадафҳои бузурги умумимиллӣ — сулҳу субот ва ваҳдати миллӣ қадамҳои нахустин гузошта шуданд. Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба аҳамияти таърихии ин Иҷлосияи сарнавиштсози миллат чунин таъкид намудаанд: «Иҷлосияи ХVI Шӯрои Олӣ бо тақозои таърих на танҳо тифли дар гавҳворабудаи Истиқлолиятро наҷот дод, балки тақдири ояндаи ӯро муайян сохт ва Тоҷикистони тозаистиқлолро ба сӯйи ҷомеаи мутамаддин ва арзишҳои волои башарӣ ҳидоят намуд».

Вакилони Иҷлосияи XVI Шӯрои Олии Ҷумҳурии Тоҷикистон Ғайбулло Афзалов ва Абдулмаҷид Достиев аз таҷриба ва хотираҳои худ ёдовар шуда, иброз доштанд, ки ташаккули сиёсии Пешвои миллат муҳтарам Эмомалӣ Раҳмон аз Иҷлосияи ХVI Шӯрои Олӣ сарчашма мегирад. Дар ҳақиқат, дар он шароит Тоҷикистони нав ба истиқлолрасида рӯзҳои даҳшатборро аз сар мегузаронд. Ҷангу низоъҳои хунин миёни тоҷикон боиси хисороти зиёди моливу ҷонӣ гардида, ба якпорчагии мамлакат ва ҳастии миллати тоҷик таҳдид мекард. Эмомалӣ Раҳмон бо тадбирҳои хирадмандона ва матонат мардуми парешонро сарҷамъ намуда, садҳо ҳазор ғурбатзадагонро ба Ватан баргардониданд.

Дар фарҷом ба вакилони Иҷлосияи XVI Шӯрои Олии Ҷумҳурии Тоҷикистон Ғайбулло Афзалов ва Абдулмаҷид Достиев се ҷилд китоби «Мактаби давлатдории Эмомалӣ Раҳмон: масъалаҳои ташаккул ва рушд» тақдим гардид.

АКС: Академияи идоракунии давлатии назди Президенти ҶТ

Ноябрь 4, 2022 10:36

Хабарҳои дигари ин бахш

Ҳайати парлумонии Тоҷикистон дар ҷаласаи 61-уми пленарии Ассамблеяи байнипарламентии ИДМ иштирок менамояд
Ҷаласаи навбатии Шурои Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор гардид
Эҳтиром ба Рӯзи Президент эҳтиром ба давлат, миллат, Истиқлолияти давлатӣ ва сулҳу ваҳдат аст
Китоби «Президент ва ниҳоди президентӣ дар Ҷумҳурии Тоҷикистон» рӯнамоӣ гардид
Дар Маҷлиси намояндагон бахшида ба Рӯзи Президенти Тоҷикистон ҳамоиш баргузор гардид
ИҶЛОСИЯИ XVI ШУРОИ ОЛӢ ВА РӮЗИ ПРЕЗИДЕНТ. Таҳлили ҳуқуқии мафҳумҳои конститутсионӣ ва таърихии давлатдорӣ
ДАР МЕҲВАРИ СУЛҲ, ВАҲДАТ ВА СОЗАНДАГӢ. Мулоҳизаҳо оид ба рисолати таърихии Пешвои миллат муҳтарам Эмомалӣ Раҳмон
Раиси Маҷлиси намояндагон бо Сафири Беларус дар Тоҷикистон вохӯрӣ намуд
Дар иҷлосияи Маҷлиси намояндагон ба якчанд қонун тағйиру иловаҳо ворид гардид
Ҷаласаи навбатии Шурои Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор гардид
Файзалӣ Идизода бо Аҳмад бин Муҳаммад Ал-Ҷарвон ба таври маҷозӣ вохӯрӣ намуд
Рустами Эмомалӣ аз шаҳри Тошканд ба шаҳри Бухоро ташриф оварданд