Тоҷикистону Олмон аз сатҳи шарикӣ миёни ду кишвар дар татбиқи лоиҳаву барномаҳо изҳори қаноатмандӣ карданд

ДУШАНБЕ, 19.11.2022 /АМИТ «Ховар»/. 18 ноябр дар Самарқанд  Вазири корҳои хориҷии Ҷумҳурии Тоҷикистон Сироҷиддин Муҳриддин бо котиби давлатии Вазорати федеролии ҳамкории иқтисодӣ ва рушди Олмон (BMZ) Нилс Аннен вохӯрӣ анҷом дод. Дар ин бор ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Дар ҷараёни мулоқот мусоҳибон роҷеъ ба ҳолати кунунӣ ва дурнамои муносибатҳои дуҷониба дар соҳаҳои иқтисодию тиҷоратӣ ва имконияти рушди баъдии онҳо табодули афкор намуданд.

Ҷонибҳо аз сатҳи шарикӣ миёни Тоҷикистону Олмон ва нақши он кишвар дар татбиқи лоиҳаву барномаҳои рушди соҳаҳои муҳими иқтисодӣ ва иҷтимоии ҷумҳурӣ изҳори қаноатмандӣ карданд.

Ёдовар мешавем, ки 18 ноябр дар шаҳри Самарқанд нахустин Конфронси ҳамбастагӣ миёни Иттиҳоди Аврупо ва Осиёи Марказӣ: «Дарвозаҳои глобалӣ» барои рушди устувор баргузор гардид, ки дар кори он ҳайати Ҷумҳурии Тоҷикистон бо роҳбарии Вазири корҳои хориҷӣ Сироҷиддин Муҳриддин ширкат варзид.

Акс: ВКХ ҶТ