Соли 2023 барои рушди иқтисоди воқеии Тоҷикистон ҷудо гардидани 12,6 млрд сомонӣ дар назар аст

ДУШАНБЕ, 08.12.2022 /АМИТ «Ховар»/. Соли оянда барои рушди иқтисоди воқеии Тоҷикистон беш аз 12,6 миллиард сомонӣ (беш аз 1,2 миллиард доллар) ҷудо шудани маблағ дар назар аст. Ин миқдор маблағ дар буҷети давлатии соли 2023 пешбинӣ шудааст, хабар медиҳад avesta.tj.

Тибқи иттилои Вазорати молияи кишвар, дар нақшаи буҷети соли оянда барои рушди иқтисодиёт 12 млрд 681,3 млн сомонӣ пешбинӣ шудааст, ки ба 9,8 фоизи Маҷмӯи маҳсулоти дохилӣ (ММД) баробар аст.

Беш аз 6 миллиард маблағ аз миқдори нишондода ба рушди бахши сӯзишворӣ-энергетикӣ равона карда мешавад. Самти афзалятноки соҳа- ин маблағгузорӣ ба соҳаи сохтмон ва таъмири неругоҳҳои барқии кишвар мебошад.

Дар умум рушди иқтисод дар соли 2023 дар сатҳи 7,8% пешбинӣ шудааст. Тибқи пешгӯӣ, ҳаҷми Маҷмӯи маҳсулоти дохилӣ 127,3 миллиард сомониро ташкил медиҳад.

Даромади Буҷети давлатӣ аз рӯи ҳамаи манбаъҳои даромад ба маблағи 37,1 миллиард сомонӣ пешбинӣ шудааст. Қисми хароҷот 38,1 миллиард сомониро ташкил медиҳад.

АКС аз манбаъҳои боз