Соли равон ба иқтисодиёти вилояти Суғд беш аз 268 миллион доллар сармоягузорӣ ҷалб карда шуд

СУҒД, 29.12.2022 /АМИТ «Ховар»/. Моҳҳои январ-сентябри соли равон ба иқтисодиёти вилояти Суғд ба маблағи 268,2 миллион доллари ИМА сармоягузории ватанию хориҷӣ ҷалб карда шудааст, ки ин нисбат ба ҳамин давраи соли гузашта 103,6%-ро ташкил медиҳад, иттилоъ медиҳад хабарнигори минтақавии АМИТ «Ховар» Саъдулло МАҲКАМ.

27 декабр дар шаҳри Хуҷанд ҷаласаи Шӯрои машваратии назди Раиси вилояти Суғд оид ба беҳтар кардани вазъи соҳибкорию сармоягузорӣ баргузор шуд.

Сардори Раёсати сармоягузорӣ ва идораи амволи давлатии вилоят Шарифҷон Ахмедов оид ба фаъолияти Шӯро ва натиҷаҳои ҷаласаи панҷуми Шӯро ҳисобот пешниҳод намуд. Зикр шуд, ки зиёда аз 140 лоиҳаҳои инвеститсионии вилоят ба маблағи умумии зиёда аз 4,9 млрд доллари ИМА ба Барномаи сармоягузории давлатӣ барои солҳои 2021-2025 ворид карда шуданд, ки бо Қарори Ҳукумати Ҷумҳурии Тоҷикистон аз 2 сентябри соли 2021 тасдиқ гардидааст.

Давоми моҳҳои январ-сентябри соли равон сармоягузориҳои хориҷию ватанӣ ба иқтисодиёти вилояти Суғд ба маблағи 268,2 млн доллари ИМА ҷалб карда шудааст, ки ин нисбат ба ҳамин давраи соли гузашта 103,6%-ро ташкил медиҳад. Дар вилояти Суғд аз рӯи ҳисоботи Раёсати андози вилоят шумораи соҳибкорони инфиродӣ ба ҳолати 1 декабри соли равон аз аввали бақайдгирӣ 112 341 нафарро ташкил медиҳад. Шумораи соҳибкорони инфиродие, ки аз рӯи патент фаъолият мебаранд, 17805 нафарро ташкил дода, шумораи субъектоне, ки тибқи Шаҳодатнома фаъолият мебаранд, дар давраи ҳисоботӣ 77856 адад ва бо шаҳодатнома бо шартҳои махсус 16680 нафарро ташкил дод.

Дар ҷаласа маърӯзаи сардори Сарраёсати кишоварзии вилоят Маъруфҷон Шарифиён оид ба самтҳои асосии рушди соҳаи кишоварзӣ шунида шуд. Мавсуф иброз дошт, ки соҳаи кишоварзӣ яке аз соҳаҳои муҳими иқтисоди миллӣ ба ҳисоб рафта, яке аз ҳадафҳои стратегии мамлакат- ин таъмини амнияти озуқаворӣ ва беҳдошти вазъи иқтисодии аҳолӣ мебошад.

Давоми солҳои охир бо мақсади рушди соҳаи кишоварзӣ аз ҳисоби маблағҳои буҷетӣ ва шарикони рушди Тоҷикистон маблағҳои зиёд ҷудо гардида, бо истифодаи онҳо барои рушди тамоми соҳаҳои кишоварзӣ тадбирҳо амалӣ карда шуданд. Дар натиҷа маҷмӯи маҳсулоти кишоварзии вилоят тадриҷан афзоиш ёфта, соли 2022 ҳаҷми умумии он 15 миллиард сомониро ташкил намуд.

Дар ҷаласа рӯнамоии лоиҳаҳои «Дафтари электронии фермер», «Аввалин интернет-мағозаи аграрӣ барои деҳқонон» сурат гирифта, аъзои Шӯро барои беҳтар намудани вазъи соҳибкорию сармоягузорӣ дар вилоят мубодилаи афкор намуданд.

АКС: Хадамоти матбуоти Раиси вилояти Суғд