Мубодилаи барқияҳои табрикии Президенти Ҷумҳурии Тоҷикистон Эмомалӣ Раҳмон ва Президенти Туркманистон Сердар Бердимухамедов

Январь 27, 2023 09:00

ДУШАНБЕ, 27.01.2023 /АМИТ «Ховар»/. Имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Туркманистон муҳтарам Сердар Бердимухамедов ба муносибати 30-солагии барқароршавии робитаҳои дипломатии байнидавлатӣ мубодилаи барқияҳои табрикӣ намуданд.

Дар барқияи табрикии Президенти Ҷумҳурии Тоҷикистон муҳтарам Эмомалӣ Раҳмон ба унвони Президенти Туркманистон муҳтарам Сердар Бердимухамедов омадааст:

«Муҳтарам Сердар Гурбангулиевич,

27 январ ба истиқрори робитаҳои дипломатӣ байни Тоҷикистон ва Туркманистон 30 сол пур мешавад.

Дар иртибот ба ин санаи хотирмон дар таърихи навтарини муносибатҳои байниҳамдигарии ду давлат ба Шумо ва мардуми дӯсти Туркманистон табрикоти самимӣ ва таманниёти неки ин ҷонибро изҳор менамоям.

Анъанаҳои дӯстӣ, рафоқат ва ҳамкории созандаи мардумони Тоҷикистон ва Туркманистон решаҳои бисёрасра доранд.

Боиси қаноатмандист, ки робитаҳои байнидавлатии гуногунҷанбаи Тоҷикистон ва Туркманистон бар асоси ин пояи мустаҳкам то имрӯз риштаҳои мухталифи мавриди манфиатҳои тарафайнро фаро гирифта, ба сатҳи шарикии стратегӣ баромадаанд.

Бо истифода аз ин фурсати муносиб мехоҳам нақши муҳими муколамаи пайвастаи сатҳи олӣ ва баланди ҷонибҳоро дар пешбурди босамари ин раванд таъкид намоям.

Мо ҷонибдори идомаи талошҳои муштараки минбаъда дар ин ҷода ҳастем. Мутмаинам, ки дар рафти мулоқоту тамосҳои дарпешистодаамон мо муносибатҳои дӯстӣ ва ҳамкориҳои судмандамонро таҳкиму тавсеаи бештар бахшида, мазмуну мӯҳтавои онҳоро бо натиҷаҳои нави амалӣ ба нафъи давлатҳо ва мардумонамон боз ҳам ғанӣ хоҳем гардонид.

Ба Шумо сиҳатмандии бардавом ва дар фаъолияти давлатиатон комёбиҳои рӯзафзун, ба мардуми бародари Туркманистон сулҳу рифоҳ ва пешрафту шукуфоии бемайлон орзу менамоям».

Дар барқияи табрикии Президенти Туркманистон муҳтарам Сердар Бердимухамедов ба унвони Президенти Ҷумҳурии Тоҷикистон муҳтарам Эмомалӣ Раҳмон, чунин гуфта шудааст:

«Муҳтарам Эмомалӣ Шарифович!

Шарафёбам аз номи мардум ва Ҳукумати Туркманистон, ҳамчунин шахсан аз номи худам ба Шумо ва тамоми мардуми бародари кишвари Шумо табрикоти самимӣ ва беҳтарин таманниётро ба муносибати 30- солагии истиқрори робитаҳои дипломатӣ миёни Туркманистон ва Ҷумҳурии Тоҷикистон ирсол намоям.

Тайи ин солҳо ҳамкории мо ба таври фаъол рушд ёфта, имрӯзҳо бемайлон мустаҳкам мегардад. Фаъолияти василаҳои муассири ҳамкорӣ дар соҳаҳои мухталиф роҳандозӣ шуда, заминаи мустаҳками ҳуқуқӣ фароҳам оварда шудааст, тамосҳои самарабахши байниҳукуматӣ ва байниидоравӣ сурат мегиранд.

Айни замон шарикии тиҷоративу иқтисодии Туркманистону Тоҷикистон рӯ ба густариши босуръат ниҳода, ҳамкориҳо дар соҳаҳои фарҳанг ва илму маориф тавсеа меёбанд, робитаҳои байнипарлумонӣ, ҳамчунин, фаъол гашта истодаанд.

Омодагии ин ҷонибро ҷиҳати ҳамкории минбаъда ва ба ҳам овардани талошҳои муштарак баҳри ба сатҳи сифатан нав боло бурдани муносибатҳои дуҷониба иброз менамоям. Мутмаинам, ки бо такя ба иродаи неки тағйирнопазири ҷонибҳо муколамаи байнидавлатии ба таври анъанавӣ дӯстона дар оянда низ мустаҳкам гардида, ба нафъи мардумонамон бомуваффақият рушд хоҳад ёфт.

Муҳтарам Эмомалӣ Шарифович, лутфан иҷозат фармоед, ки бо истифода аз ин фурсат ба Шумо барои таваҷҷуҳи бузурги шахсиатон ба рушди шарикии Туркманистон ва Тоҷикистон изҳори сипос намуда, аз самими қалб саломатии бардавом ва дар фаъолияти сермасъули давлатиатон комёбиҳои навин ба хотири пешрафту шукуфоии мардуми бародари Ҷумҳурии Тоҷикистон орзу намоям».

Январь 27, 2023 09:00

Хабарҳои дигари ин бахш

Пешвои миллат Эмомалӣ Раҳмон пас аз анҷоми сафари корӣ дар Вилояти Мухтори Кӯҳистони Бадахшон ба шаҳри Душанбе баргаштанд
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони Вилояти Мухтори Кӯҳистони Бадахшон мулоқот намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони Вилояти Мухтори Кӯҳистони Бадахшон
Президенти Ҷумҳурии Тоҷикистон Эмомалӣ Раҳмон дар шаҳри Хоруғ дар тантанаҳои идона ба ифтихори 28-солагии Рӯзи ваҳдати миллӣ иштирок намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон ба ифтихори 28-солагии Рӯзи ваҳдати миллӣ
Сарвари давлат Эмомалӣ Раҳмон дар шаҳри Хоруғ бинои нави истиқоматии 5-ошёна барои хизматчиёни давлатиро мавриди истифода қарор доданд
Пешвои миллат Эмомалӣ Раҳмон дар ҳудуди Парки технологии шаҳри Хоруғ коргоҳҳои истеҳсолии маҳсулоти гӯштӣ ва обҳои табиии ташнашиканро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ бо лоиҳаҳои биноҳои истиқоматӣ бо маркази хизматрасонию тиҷоратӣ, таваққуфгоҳи нақлиётӣ, меҳмонхона ва майдончаи варзишии кӯдакон шинос шуданд
Сарвари давлат Эмомалӣ Раҳмон дар шаҳри Хоруғ китобхонаи кӯдаконаи вилоятӣ, китобхонаи шаҳрии ба номи Ҳофизи Шерозӣ ва Маркази рушди зеҳни сунъиро ифтитоҳ намуданд
Пешвои миллат Эмомалӣ Раҳмон дар шаҳри Хоруғ Маркази фарҳангӣ, савдо ва Шурои иттифоқҳои касабаи вилоятро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ чойхонаи Хатлонро ба истифода доданд
Сарвари давлат Эмомалӣ Раҳмон дар шаҳри Хоруғ пули мошингузарро мавриди баҳрабардорӣ қарор доданд