«РӮДАКӢ». Дар Душанбе операи Шарофиддин Сайфиддинов дар шакли нав пешниҳоди тамошобинон мегардад

Январь 11, 2023 14:17

ДУШАНБЕ, 11.01.2023 /АМИТ «Ховар»/. Бори аввал дар саҳнаи Театри давлатии академии опера ва балети ба номи Садриддин Айнӣ операи Шарофиддин Сайфиддинов «Рӯдакӣ» дар шакли нав, бо ворид кардани қисматҳои қаблан буридашудаи муаллиф намоиш дода мешавад. Дар ин бора ба АМИТ «Ховар» дар бахши матбуоти театр хабар доданд.

Бино ба гуфтаи Ҳунарпешаи халқии Тоҷикистон, коргардони лоиҳаи мазкур Шавкат Халилзода, бисёре аз порчаҳои операи даврони шўравӣ ба варианти ниҳоӣ дохил карда нашуда буданд.
«Мо он порчаҳое, ки то ҳол барои тамошобинон намоиш надода будем, барои ифшои нақши таърихии Рӯдакӣ, ки дар рушди фарҳанг ва ҳаёти иҷтимоии мардуми тоҷик аҳамияти муҳим доранд, барқарор хоҳем кард», -таъкид кард Шавкат Халилзода.

Номбурда тазаккур дод, ки Рӯдакӣ на танҳо поягузори адабиёти тоҷику форс, одамушшуаро, султони шоирон, қофиласолори шеър, балки рамзи бедориву худшиносӣ ва истиқлолхоҳӣ, инчунин рамзи ҷовидонаи адаб ва фарҳанги миллати куҳанбунёди тоҷик мебошад.

«Пешвои миллат муҳтарам Эмомалӣ Раҳмон аз минбарҳои баланди ҷаҳонӣ дар бораи саҳми «падари шоирон» дар инкишофи забони тоҷикӣ, аҳамияти донистани забони модарӣ ҳамчун такягоҳи устувори маданияти миллӣ таъкид мекунанд, ки: «забони тоҷикӣ ифодагари арзишҳои маънавӣ ва инъикосгари ибратбахши рӯзгори мост»»,-иброз дошт коргардон.
Хотиррасон мекунем, ки нахустнамоиши операи Ҳунарпешаи мардумии Тоҷикистон Шарофиддин Сайфиддинов ҳанӯз соли 1976 баргузор шуд (ҳарчанд кор дар либретторо хеле пештар аз он Сотим Улуғзода ва Сергей Севертс пешкаш карданд) ва он байни тамошобинон шуҳрати хоса пайдо намуда буд.

Директори театр Камолиддин Сайфиддинзода гуфт, ки «саъю кӯшиши ҳамкорони мо ҳоло ба навсозии намоиш ва аз нав пур кардани намоишномаҳои нави миллӣ равона карда шудааст, ки онҳо аз асарҳои воқеан бошукӯҳ иборатанд. Барқарорсозии асарҳои асри гузашта ва кор дар рӯи намоишномаҳои нав аз ҷумлаи онҳо мебошанд».

«Тавре Сарвари давлат муҳтарам Эмомалӣ Раҳмон борҳо таъкид кардаанд, рисолати худшиносии шаҳрвандӣ, иҷтимоӣ, эстетикии одамон ба ходимони фарҳанг гузошта шудааст ва дар ҳар як ташаббуси созанда амалӣ намудани он рисолати муҳим аст», — илова кард Камолиддин Сайфиддинзода.

Лоиҳаи нави театрӣ пас аз қабули «Қонун дар бораи тарбияи ватандӯстӣ» айни муддао буда, барои ташаккули симои маънавии ҳамватанон нақши босазо мегузорад.

Ҳунармандони театр ба муваффақияти намоишнома итминон дошта, умед доранд, ки лоиҳаи нав барои тамошобинони дохиливу хориҷӣ писанд хоҳад омад.

АКС: Театри давлатии академии опера ва балети ба номи Садриддин Айнӣ

Январь 11, 2023 14:17

Хабарҳои дигари ин бахш

Зеҳни сунъӣ дар соҳаҳои санъати тасвирӣ ва дизайн тағйироти амиқ ба вуҷуд овардааст
Дар Тоҷикистон Озмуни ҷумҳуриявии «Рӯзнома ва маҷаллаи беҳтарин дар соли 2025» оғоз гардид
Барои мукофотонидани ғолибони Озмуни ҷумҳуриявии «Шоҳномахонӣ» 2 миллиону 660 ҳазор сомонӣ ҷудо карда мешавад
ТУҲФАИ АРЗАНДАИ ПРЕЗИДЕНТИ ТОҶИКИСТОН. Ба беш аз 57 ҳазор оилаи шаҳри Ваҳдат «Шоҳнома» тақдим мегардад
ИЛМ ДАР БАЛАНДИИ ЗИЁДА АЗ 5000 МЕТР. Дар калонтарин пиряхи Тоҷикистон — Ванҷях таҳқиқоти илмӣ гузаронида шуд
Академияи миллии илмҳои Тоҷикистон бо Донишгоҳи давлатии омӯзгории Шинҷони Чин ҳамкориро тақвият медиҳад
Ёдгориҳои нодири тамаддуни тоҷикон дар Осорхонаи миллии Чин ба намоиш гузошта шуданд
Аз ҷониби нашриёти «Адиб» чор китоб ба нашр расид
Туҳфаи арзишманди Пешвои миллат — китоби «Шоҳнома» ба ноҳияи Файзобод расид
Байни консерваторияҳои Тоҷикистон ва Чин Ёддошти тафоҳум ба имзо расид
Намояндагони Шурои байналмилалии ҳунармандӣ бо намунаҳои сӯзании Панҷакент шинос шуданд
Сокинони шаҳри Роғун соҳиби туҳфаи Президенти Тоҷикистон — «Шоҳнома»-и Абулқосим Фирдавсӣ гардиданд