ТАВЗЕҲИ ПАЁМИ ПЕШВОИ МИЛЛАТ. Ба фаъолони ноҳияҳои Абдураҳмони Ҷомӣ ва Панҷ нуктаҳои асосии ин ҳуҷҷати муҳим фаҳмонида шуданд

ДУШАНБЕ, 05.01.2023 /АМИТ «Ховар»/. Тибқи нақшаи чорабиниҳои Маҷлиси намояндагон аз 30 декабри соли сипаригардида то 8 январи соли равон вакилони Маҷлиси намояндагони Маҷлиси Олии Ҷумҳурии Тоҷикистон, дар ҳавзаҳои интихоботӣ ба интихобкунандагон ва аҳолӣ Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олиро шарҳу тавзеҳ медиҳанд. Дар ин бора АМИТ «Ховар» бо истинод ба Маҷлиси намояндагон хабар медиҳад.

Раиси кумитаи Маҷлиси намояндагон оид ба масъалаҳои иҷтимоӣ, оила ва ҳифзи саломатӣ Сумангул Тағойзода, вакили Маҷлиси намояндагон Гулбаҳор Ашурзода ва вакили Маҷлиси вакилони халқи вилояти Хатлон Умедхоҷаи Зоир бо роҳбарият ва хизматчиёни давлатии ноҳияи Абдураҳмони Ҷомӣ оид ба Паём мулоқот намуда, оид ба мазмуну муҳтавои созандаи он зикр доштанд, ки Паём ҳуҷҷати муҳиму сарнавиштсоз ва барномаи мукаммали созандагию бунёдкорӣ дар мамлакат мебошад.

Мулоқотро Раиси ноҳияи Абдураҳмони Ҷомӣ Сафармаҳмад Раҳимзода ҷамъбаст намуда, баҳри дар амал татбиқ намудани дастуру ҳидоятҳои Пешвои миллат, ки аз Паёмашон ба Маҷлиси Олӣ бармеоянд, дар назди масъулин вазифаҳои мушаххас гузошт.

Паёмҳои Президенти кишвар муҳтарам Эмомалӣ Раҳмон ба Маҷлиси Олӣ барои тамоми соҳаҳои хоҷагидории мамлакат ҳамчун роҳнамо хизмат менамоянд.

Инчунин вакилони Маҷлиси намояндагон Зоир Раҳмонзода ва Гавҳар Шарофзода барои шарҳу тавзеҳ додан ва омӯзиши бандҳои Паёми навбатии Пешвои миллат ба ноҳияи Панҷ сафар намуданд.

Вохӯрии вакилони Маҷлиси намояндагон дар маркази ноҳия бо кормандони мақомоти ноҳия, кормандони соҳаҳои маорифу тандурустӣ, фарҳанг, ҷавонону занон, ҳифзи ҳуқуқу тартиботи ҷамъиятӣ ва фаъолони хоҷагии халқ доир гардид.

Вакилони мардумӣ нуктаҳои Паёмро ба иштирокчиёни ин вохӯрӣ расонида, изҳор доштанд, ки Паёмҳои Президенти кишвар муҳтарам Эмомалӣ Раҳмон ба Маҷлиси Олӣ барои тамоми соҳаҳои хоҷагидории мамлакат роҳнамою дастури муфид арзёбӣ мешаванд, ки ба татбиқи тадриҷии ҳадафҳои стратегии мамлакат, аз ҷумла беҳтар намудани шароити иқтисодиву иҷтимоӣ, маърифатнокии ҷомеа, таҳкими ғояҳои сулҳу субот ва истиқлолияти давлатӣ нигаронида шуда, бо таҳлилҳои амиқ, натиҷагириҳои асоснок ва масъалагузориҳои мушаххас ба рушду равнақи тамоми соҳаҳои кишвар алоқаманд мебошанд.

Паёмҳои Пешвои миллат фарогири масъалаҳои банақшагирии стратегӣ ва дурнамосозии давлатии соҳаҳои иқтисоду саноат, энергетика, роҳу нақлиёт, амнияту мудофиа, ҳифзи ҳуқуқу тартибот, тандурустӣ, фарҳанг, илму маориф, ҳифзи иҷтимоии аҳолӣ, ҷавонон, варзиш, сайёҳӣ ва сиёсати хориҷӣ мебошанд.

Акс: МН МО ҶТ