Гурӯҳи намояндагони мақомоти давлатӣ ва соҳибкорони Суғд ба вилояти Нижегороди Русия сафар намуд

ДУШАНБЕ, 09.02.2023 /АМИТ«Ховар»/. Ҷиҳати таъмини рушди иқтисодиву иҷтимоӣ ва ҷалби сармояи хориҷӣ ба иқтисодиёт роҳбарият, намояндагони мақомоти давлатӣ ва гурӯҳи​ соҳибкорони вилояти Суғд ба вилояти Нижегороди Федератсияи Русия сафар намуданд. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Ҳадаф аз ин сафар густариши робитаҳои иқтисодӣ, шиносоӣ бо вазъи иқтисодӣ, ба роҳ мондани ҳамкорӣ дар бахшҳои саноату кишоварзӣ, ҷалби сармоя ба иқтисодиёти вилоят ва ташкили корхонаҳои нави саноатӣ буда, дар назар аст, ки дар доираи сафар мулоқоту музокироти дуҷониба сурат гирад.

Дар доираи сафар аъзои гурӯҳ аз корхонаҳои саноатии​ «Борская войлочная фабрика», «Борский стекольный завод» ва корхонаи истеҳсоли плита ва блок барои сохтмон боздид карда, барои ба роҳ мондани ҳамкорӣ гуфтушунид анҷом доданд.

Намояндагони вилояти Суғд бо тарзи коркарди пашм ва истеҳсоли маҳсулоти ниҳоӣ аз он, истеҳсоли шиша барои мошин ва биноҳо, истеҳсоли маҳсулоти сохтмонӣ дар вилояти Нижегород шинос гардиданд.

АКС: Хадамоти матбуоти Раиси вилояти Суғд