Дар Академияи идоракунии давлатӣ Иди байналмилалии Наврӯзро ҷашн гирифтанд

ДУШАНБЕ, 18.03.2023 /АМИТ «Ховар»/. Субҳи имрӯз дар Академияи идоракунии давлатии назди Президенти Ҷумҳурии Тоҷикистон ба муносибати Ҷашни байналмилалии Наврӯз ҳамоиши идона баргузор гардид. Дар ин хусус ба АМИТ «Ховар» дар Академияи идоракунии давлатӣ хабар доданд.

Дар чорабинӣ роҳбарияту кормандони Академия, намояндагони Агентии хизмати давлатӣ ва меҳмонон иштирок намуданд.

Тазаккур дода шуд, ки Ҷашни байналмилалии Наврӯз яке аз маросими суннатии мардуми тоҷик ба ҳисоб рафта, бо сифатҳои башардӯстонааш аз ҷониби ҷомеаи ҷаҳонӣ ҳамчун дастоварди камназири фарҳанги умумиинсонӣ пазируфта шудааст. Ҷашни Наврӯз таҷассумгари некиву накӯкорӣ, хуррамиву хушҳолӣ, шодмониву нишот ва саодату пирӯзиро буда, фарҳанги оламшумули мардуми тоҷикро тавассути ойинҳои худ машҳури олам гардонидааст.

Дар идома аз ҷониби роҳбарияти Академия як зумра омӯзгорону кормандони ин муассиса дар арафаи ҷашни Наврӯз бо унвони «Аълочии маориф ва илми Тоҷикистон», Сипосномаи Вазорати маориф ва илми Ҷумҳурии Тоҷикистон ва Сипосномаи Академияи идоракунии давлатии назди Президенти Ҷумҳурии Тоҷикистон сарфароз гардонида шуданд.

Дар фарҷом намоиши театрӣ пешкаш гардонида шуд, ки дар ҷараёни он анъаноти миллӣ, расму ойини наврӯзӣ ва эҳсоси меҳандӯстиву ифтихор аз гузаштаи пуршарафи миллати тоҷик тараннум гардид.

АКС: Академияи идоракунии давлатии назди Президенти Ҷумҳурии Тоҷикистон