Бар асари бориш ва обхезиҳо дар Афғонистон 42 нафар ҳалок шуд

ДУШАНБЕ, 30.05.2023 /АМИТ «Ховар»/. Бориши шадид ва обхезии як моҳи охир дар Афғонистон ҷони 42 нафарро аз байн бурда, 45 тани дигар маҷрӯҳ шудааст. Дар ин хусус АМИТ «Ховар» бо истинод ба агентии «Синхуа» иттилоъ медиҳад.

«Бориши шадид ва обхезӣ ҳамчунин 341 хонаро тахриб карда, тақрибан ба 20 000 гектар замини кишт зарар расонид», — хабар медиҳад шабакаи телевизионии маҳаллии Tolonews.

Мувофиқи иттилои манбаъ, офати табиӣ аз 34 вилояти кишвар 23-тоаш, умдатан Қандаҳору Кунар, Хуст, Бадахшон, Каписо ва Дайкундиро фаро гирифта, боиси ҳалокати 13 ҳазор сар чорвои калони шохдор гардид.

Хадамоти обу ҳавошиносии Афғонистон пешгӯӣ мекунад, ки дар се рӯзи оянда дар баъзе қисматҳои ин кишвар бори дигар бориши шадид  ҳамроҳ бо боди сахт ва обхезӣ дар назар аст.

Азиза ИКРОМ,
АМИТ «Ховар»

АКС: АИ «Синхуа»