АРМУҒОНИ ПРЕЗИДЕНТИ ҶУМҲУРИИ ТОҶИКИСТОН. Китобҳои нависанда, рӯзноманигор ва коргардони тоҷик Сайф Раҳимзоди Афардӣ бознашр гардид

ДУШАНБЕ, 02.06.2023. /АМИТ «Ховар»/. Ба хотири арҷ гузоштан ба хизматҳои нависанда, рӯзноманигор ва коргардони боистеъдоди тоҷик Сайф Раҳимзоди Афардӣ бо дастгирии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон китобҳои ин нависандаи хушбаён бознашр гардид. Дар ин хусус АМИТ «Ховар» бо истинод ба Вазорати фарҳанги Ҷумҳурии Тоҷикистон хабар медиҳад.

Китобҳои «Чашми саҳар», «Гунҷишки сафед», «Аз ёдҳо, аз ёдҳо», «Ситораҳои сари танӯр», «Падруду пайғом», «Васвасаҳои зикривайҳ» ва «Доғҳои офтоб», ки солҳои гузашта ба нашр расида буданд, бо назардошти хонандаи зиёд доштанашон барои насли ҷавони замони Истиқлол аз нав чоп карда шуданд.

Бояд гуфт, ки аксари қиссаву ҳикояҳо инъикосгари рӯзгори мардуми заҳматкаши кӯҳистон буда, симои қаҳрамонҳои асар воқеӣ ба қалам дода шудааст ва яке аз хусусияти ҷолиби осори Сайф Раҳимзоди Афардӣ низ ҳамин аст.

Нашри китобҳои мазкур барои алоқамандони адабиёт туҳфаи арзишманд буда, барои пос доштани хотири яке шахсиятҳои барҷастаи миллат — Сайф Раҳимзоди Афардӣ амали неку мондагор мебошад.

АКС: Вазорати фарҳанги Ҷумҳурии Тоҷикистон